MFA Futsal League Club-te inhmukhawm

Nimin han Mizoram Football Association Futsal League khel tur club aiawh, MFA hruaitute leh MFA Futsal Committee Member-te chu Grand Hotel-ah an inhmukhawm a, January 2018-a MFA Futsal League lo thleng tur an thlirlawkin, MFA Futsal League logo tlangzarh a ni bawk.

MFA aiawha thusawitu Lalruatsanga Tochhawng, MFA Finance Secretary chuan MFA-in hmalam pan zelin Futsal a luhchilh a, hun rei lo te chhungin League kalpui thei tura a inpeih thei chu MFA Futsal Committee leh MFA thawhpui Zonet Cable TV-te inpekna a nih thu a sawi a, an chungah lawmthu a sawi a–MFA Futsal League Logo a tlangzarh nghal a ni.

MFA Honorary Secretary Lalnghinglova Hmar chuan Futsal League atan inbuatsaihna chak taka kalpui a nih thu a sawi a, "Aizawl veng hrang hrang 16-te inelna tur a nih vangin a phurawm a, player ṭha tak tak football lama kan hmelhriat sate leh kan la hmelhriat loh Futsal player thate an inel dawn a ni," a ti.

MFA Futsal Committee Secretary Malsawma Renthlei chuan league kalphung tur leh hriat ngaite a sawifiah.

Futsal League khel tur club aiawhte nen league kalphung turte sawiho a nih bakah January 5-a League Kickoff neih tur thu inhrilh a ni a, January 9-ah inelna hi tan a ni ang.