Bagan chak zawh loh zanah Chennai chak

I League nomawi chawi ngei tumin sum tam tak seng mah se Mohun Bagan tan beisei ang ngawtin India rama football inelna sang ber a awlsam lo–Kolkata club hian Thawhlehni khan an mikhual NEROCA chu goal khung loin an inhnehtawkpui a, table chung bera awm Minerva Punjab an phak lohna chu match nga ve ve khelh tawhah point li a ni tawh.

Hetihlai hian chak hmel hmu thei lo Chennai City-in match nga an khelh tlinnaah a vawi khat nan hnehna an chang ve ta bawk a, South Indian club hian Thawhlehni zan khan an mikhualna ramah Churchill Brothers chu 2-0 in an hneh a, hnehna hlado an chham ve thei ta.

Beisei phak lo

Salt Lake Stadium-ah Mohun Bagan-in hnehna an chan ngei beisei a ni a, coach Sanjoy Sen chuan tlarhmaah a player chhuanvawr Ansumana Kromah, Sony Norde leh Aser Pierrick Dipanda Dicka te inkhel bul ṭantir nghalin attacking football khelh a tum a, a beisei ang goal erawh an hlawh chhuak thei lo.

Kromah, Norde leh Dicka ten Manipur tlarhnung an chhaih mangang hman meuh lo a, tun hnaia inhliam Norde-a la in fit tawk lo tih chiang takin a lang bawk. NEROCA tan Bagan player hlui Subhash Singh a langsar a, Manipur tlangval hi Kolkata club chhaih mangang bertu a ni.

Bagan buaina

Chawlhlawk hman a nih hnuah Bagan-in point thum hlawhchhuah ngei tumin theihtawp chhuah mah se beisei an phak thei lo a, Minute 51-naa Norde goal khung lawmin fan-te lam hman mah se linesman-in offside a phar a, Haiti international goal khung hi pawm sak a ni lo.

NEROCA lamin Bagan lama goal khung tum aiin defensive game khelh a fuh zawk tih an hria a, mikhualna ramah point khata lungawi tumin an khel. Bagan buaina erawh belhchhahin a awm a, minute 83-naah hliam vangin Norde lakchhuah a ni a, minute ruk hnuah Kromah lakchhuah a ngai bawk–goal lut loin inkhel a tawp. Bagan tan hian Ricky Lallawmawma chuan inkhel bul a ṭan a, Manipur club lamah David Lalbiakzara chuan bench lamah hun a hmang tluan thung.

Player thar Watson

Player hliam an ngah avangin Mohun Bagan an talbuai a, Kolkata club hian NEROCA laka hliam damchiang lo chunga inkhel Norde leh Kromah bakah Aizawl FC midfielder hlui Yuta Kinowaki chu hliam vangin an chhawr thei lo mek bawk a, hetiang boruak karah hian Australian midfielder Cameron Watson an lalut.

Hetihlai hian Watson ang thoa FC Porto aṭanga in zir chhuak an lakluh Diogo Ferreira chu match khat pawh a khelh hmain an chhuah zalen thung a, Ferreira hian chhungkaw buaina chhuanlamin Bagan hi chhuah a dil a ni. Kum 30 mi Watson hi Indian football-ah mi thar a ni lo. Season hmasa khan Bengaluru FC tan a khel tawh a, A League club Adelaide United tan 2010-15 season chhung lo khel tawh bawkin Bagan tan ṭangkaipui theih tur khawpa thiam player a ni.

Chennai an chak

Mohun Bagan an chak zawh loh laiin Chennai City erawhin Churchill Brothers khelmualah an theihna an pholang a, an mikhualna ramah Goan club hi 2-0 in an hneh. South Indian club tan Jean-Michel Joachim chuan hnai set sawt aṭanga a hun ṭha neih a khawhral hnuah Ligue 1 club Nancy striker hlui hian goal hmahruai a khung ta nge nge a, Israil Gurung ven karah Goan fans a ngawih tir.

Chennai City-in goal hmahruai an khung hmain vawi hnih ngawt bar an pet per a, Joachim-a'n goal a khung hnuah erawh an vanduai reng bik tawh lo–Timor-Leste international Murilo de Almeida chuan minutes 52-naah an goal hnihna a khung chhunzawm a, Churchill tan defender Banpynkhrawnam Nongkam hnawhchhuah zui niin tho leh turin an tlin tawh lo.