Mangṭha Lewy, hei le Immobile

Inkharkhip a zawh hlima European Golden Shoe dawng tura rinkai ber chu Bundesliga goal 34 khungtu Robert Lewandowski a ni a, tunah erawh Bayern Munich striker chungah Immobile a awm ta.

Poland international Lewy-a'n league match khelh tur a nei tawh loh avangin atan beiseina a thamral a, lawmman dawng tura a elpui dang Ronaldo pawhin a match hnuhnung bera a chet ṭhat dana zirin a la khum leh thei.

French football magazine L'Equipe chuan 1967-68 season aṭang khan European Golden Boot hi a sem ṭan a, 1996-97 season aṭang khan chanchinbu lian ṭhenkhat Marca, La Gazzetta dello Sport leh Kicker te awmna European Sports Media (ESM) chuan a sem ta thung.

ESM-in lawmman an sem aṭang hian kalphung thar an siam, European League zawng zawnga goal khung hnem chu chhiar tho mah se an league len dan a zirin point an pe hrang ṭhin, league lian loa khung ai chuan league liana khungin kawngro a su thui hle. League lian panga La Liga, Premier League, Serie A, Bundesliga leh Ligue 1-a an goal khung zat chu pahniha puntir a ni, league lian parukna aṭanga 21 thlenga mite chu pakhat leh a chanve (1.5) a puntir an ni a; a hnuai lam zawng chu pakhata puntir an ni thung.

Goal khung hnem lawmman hi Lionel Messi-a'n vawi ruk dawng tawhin record nei ṭha ber a ni a, pahnihna chu vawi li dawng tawh Cristiano Ronaldo a ni thung. Messi leh Ronaldo han hnaih deuh tumah reng an awm lo.