Tluk der vangin Lanzini hrem

West Ham midfielder Manuel Lanzini chu Stoke City nen Premier League an khelh ṭuma a tluk der avangin match hnih khel thei lo tura hrem a ni.

Argentine playmaker hi defender Erik Pieters nen ball an inchuhna lamah a tlu der a, penalty a hlawh chhuak hial. Mahse, tun season aṭanga dan an hman ṭanah tlu der chu hrem theih an ni a, inkhelh laiin penalty hmuh phah mah se Football Association lam chuan a chet dan hi an hmuh hmaih lo.

Kum 24 mi Lanzini hi nizana Arsenal nen League Cup an khelhah a inlan thei lo a, kartawpa Newcastle United nen league match an khelh hunah pawh a inlan lo ang.

West Ham manager David Moyes chuan referee Graham Scott a dem lo, "Referee kha player aṭanga yard 10-a hla lekah a awm a, chiang taka a hmuh theih nan amah hliahtu an awm lo bawk, kan khingpui defender khan a tisual zawk a ni," tiin a player chu thiam loh chantir ni mah se a ṭan hle.