Khelmualah FA Cup dawng dawn

English football-a inelna ngaihhlut hlawh FA Cup final chu Inrinni zan dar 10:00 hian Arsenal leh Chelsea ten an khel dawn a, season dang ang lo takin champion nomawi erawh Royal Box-ah inhlan a ni dawn lo. 

FA Cup final hi khelmual hmingthang Wembley-ah khelh ṭhin a ni a, English football-a inkhel player-te chuan Royal Box-a lawn kai a, nomawi chawi hi an mangphan a ni ṭhin. Mahse, coronavirus vanga UK sorkar inkaihhruaina dan avangin kumina FA Cup champion erawh Royal Box an lawn kai a rem dawn lo a, khelmual lamah nomawi an chawi mai a ngai dawn a ni. 

Hei mai hi a ni lo - nomawi inhlanna programme hranpa a awm dawn lo a, Arsenal leh Chelsea inkhela chak zawk captain chuan nomawi hlantu hran awm loin nomawi innghahna aṭangin nomawi hi an chawi kang ang. Kumin FA Cup final hi rilru lama buaina tawk te pualin hlan a ni a, FA president Prince William chuan video kaltlangin rilru lam buaina chungchanga awareness a nei dawn bawk a ni.