Man City-in Nathan Ake lalut dawn

Bournemouth-in Dutch defender Nathan Ake man atana Manchester City dilna pound maktaduai 40 an pawm. Cherries hi Premier League aṭangin an relegate a, Ake hi an club history-a player manto ber tur a ni ang.

Kum 25 mi Ake a chet ṭhat dan a zirin a man hi pound maktaduai khatin a la pung thei ang. Manchester City manager Pep Guardiola hian tun season-ah Premier League an champion ṭuma defender Vincent Kompany thlakna tur centre back a lalut lo a, season tharah erawh tlarhnung tih chak nan a tlem berah pakhat hi chu a lak ngei rin sa a ni.

Man City hian hun eng emaw ti chhung chu Ake hi an enthla tawh a, 18-na nichunga Cherries an relegate tak avangin pahnihna ni pha club tan hna a awlsam sawt. Chutihrualin Ake hi season thara chhuak tura ngaih a ni sa hrim hrim bawk. Kum 25 mi Ake hi Feyenoord-ah a naupan lai hun a hmang a, Chelsea youth team zawmin beiseina sang tak mah se Blues senior team tan khelhna hmun chan a harsat. 

January 2017-ah loan hmangin Ake hian Bournemouth a zawm a, Cherries hian June thlaah an la nghet. Dutch defender hi ke vei lam hmangthiam a ni a, Bournemouth tan tun season league match 29-ah a inlan. Netherlands tan Ake hi match 13 a khel tawh a, Manchester City-ah hmun pawimawh a chang thei a nih chuan nakkuma khelh tur Euro 2020-ah ram tan hmun pawimawh chang turin beiseina sang zawk a nei ang. Bournemouth hian nikum khan pound maktaduai 20-in Aston Villa-ah Tyrone Mings an hralh a, Dutch defender Ake hian contract a ziah fel hunah Cherries player manto ber record thar a siam ang.