El Clasico ; Bale leh Zidane-a hun tawp?

Vawiin tlai dar 5:30-ah Real Madrid-in La Liga hmahruaitu Barcelona an mikhual dawn a, zawhna awm nghal chu Real Madrid forward Gareth Bale leh Zinedine Zidane-a hun tawp a ni dawn em? tih hi a ni a, a chhanna pekin kan awm thuai dawn.

La Liga-ah Barcelona-in hma an hruai mek a, palina Real Madrid aia an san zawkna chu point 11 a ni - zaninah hnehna an chang a nih ngat chuan Real tan Barca umphak beisei a harsa tawh dawn a, Krismas hma hauha khawvelin Ernesto Valverde naute hi champion tura a ngai hman a nih pawhin thil awm lo a ni lo ang.

Bale hun tawp?
A hun laia khawvel player manto ber meuh nichungin Gareth Bale-a'n Real Madrid a pan a, season hmasa pahnih lamah a man phu tawkin khel ṭhin mah se tun hnaiah erawh hliamin a tlakbuak nasat avangin beisei a phak lo a, match 12 chiah khelin goal li a khung - khawthlang media te zawhna chu "Bale-a tan El Clasico hnuhnung ber a ni tawh mai ang em?" tih hi a ni.

Spanish chanchinbu lar La Vanguardia-a infiamna huang ziaktu Santi Segurola chuan, "Khelmual chhung leh transfer bazar thlengin Bale-a hlutna a tlahniam tawh," tiin a ziak a, Spanish chanchinbu lar vek Diario AS chuan, "Madrid-in a hlawh an pe a, Wales-in a thiamna an chhawr thung," tiin Bale a dim bik lo - Welsh forward lakah Real dawhtheihna a nghing ṭan niin a lang.

Bale aia Benzema
Gareth Bale tana thu hriat nuam lo tak chu Real boss Zinedine Zidane-a'n Karim Benzema a duh zawk tlat hi a ni a, vawiin tlaiah Welsh forward hian inkhel bul a ṭan lo a nih pawhin a mak lo ang. Benzema-a'n tun season-ah match 19 a khel tawh chungin goal li chiah a la khung a, mah se Zidane chuan French striker hi chhan tlatin, "Thih thlengin ka chhan tlat ang," a ti!

Chumi awmzia chu tlar­hmaah Cristiano Ronaldo chu sawi nghin rual loh a ni a, Spanish international pathum Isco, Marco Asensio leh Lucas Vazquez te nen Bale hian hmun an inchuh dawn tihna a ni. Zidane-a'n Real-in BBC chhawr chunga 4-3-3 formation an hman aiin 4-4-2 a ngaizawng zawk a, midfield-ah tlarhnung puitu Casemiro chu playmaker pahnih Luka Modric leh Toni Kroos ten an hual ang a, Isco ball thiamna chu a hmawr bawk nan an hmang ṭhin.

Zidane-a hun tawp?
Gareth Bale him loh thu kan sawi a, chu aia dinhmun him lo lehzual chu Zinedine Zidane a ni. Zidane-a kaihhruaina hnuaiah Real hian kum hnih a tlin hma hauhin nomawi pariat an chawi fel der tawh a, heng a hlawhtlinna leh Real legend a lo nih tawhna chuan Zidane hi tun season-ah a la hum mai mai niin khawthlang media te chuan an ngai - Real president Florentino Perez tluka manager 'ban' nuam ti an awm lo.

Vawiina an coach hi Zidane kher chu ni lo se Real hian an mangṭha fel leh der tawhin a rinawm. Mahse, Spanish champion hian zaninah Barca an ngam lo a nih ngat chuan an hmelma kumhlun hi point 14-in an phak tawh dawn lo tihna a ni a, kumtin champion duh Real-in a zawna Champions League nomawi chawipuitu an ban a nih pawhin a mak lo ang - a tawi zawnga sawi chuan Zidane tan tlawm a thiang lo.

Valverde-a fimkhur
Barca-in hnehna an chang a nih chuan La Liga nomawi an chawi ngei tawh rinna sang viau mah se Catalan club manager Er­nesto Valverde ngaihdan erawh a dang thung. Spa­nish ma­­nager chuan, "El Clasico-a hnehna kan chan avang maiin kan champion tawh dawn tihna a ni lo. Atletico-in min thlauhna hi point ruk chauh a ni a, tun hi thutlukna siam hun a la ni lo," a ti.

Valverde chuan Santiago Bernabeu pan tura an inpeih thu sawiin, "Hlim takin Bernabeu hi kan pan ang. Inbuatsaihna ṭha tak kan neih avangin ṭha takin kan khel dawn. Kan hmelma kumhlun hmaah game hautak kan hmachhawn dawn a, mah se kan inpeih tawh a ni," tiin a sawi.

Messi vs Ronaldo
Real leh Barca an inhma­chhawn dawn chuan Lionel Messi leh Ronaldo hming lamrik loh theih a ni lo a, tu nge player ṭha zawk tih thuah inhnialna kumkhuain a awm dawn - tun dinhmuna chiang tak erawh El Clasico-ah Ronaldo aiin Messi a pui zawk.

Argentina captain hian match 36-a Real-a hmachhawn tawhah goal 24 a khung a, match 28-a goal 17 khungtu Ronaldo-a'n a la phak lo hle - Clasico chanchinah Messi aia goal khung hnem thei an la awm lo. Assist lamah pawh Ronaldo-a'n Messi a phak lo hle - Argentine forward-in Clasico-ah assist 13 a neih tawh laiin Ronaldo erawhin pakhat chiah a la nei!