Everton hmachhawn lo tur Morata

Premier League champion Chelsea chuan zanin dar 6:00 hian tun hnaia harhtharna chang Everton an lenchilh dawn a, Blues striker Alvaro Morata chu hrem vangin a inlan thei dawn lo.

Spain international Morata hian Bourne­mouth 2-1 a an hneh ṭum­in chakna goal a khung a, a goal khung lawm nan hian ball lain a jersey chhungah a thun a, a kut vei lamin 'A' shape a siam bawk - a nupui Alice Campello-i'n fa a pai vanga ti a ni; a goal khung lawm dan avang hian yellow card pek a ni a, tun season chhunga yellow card vawi nga a hmuhna a nih avangin match khat chhung atan hrem a ni.

Kum 25 mi Morata hian Everton hmachhawn thei lo mah se Boxing Day-ah Brighton a hmachhawn thei dawn a, kumina an match hnu­hnung ber atan December 30 hian Stoke City an la tawng leh dawn bawk.

Morata a awm dawn loh vangin Antonio Conte-a'n ṭum danga a tih tawh angin Eden Hazard chu tlarhmaah a awm leh tura ngaih a ni, Belgium international thlawp tur hian Pedro leh Willian te an awm leh bawk ang.

Everton manager Sam Allardyce-a'n player hliam a ngah - Leighton Baines, Ross Barkley, Ramiro Funes Mori, Seamus Coleman, James McCarthy leh Maarten Stekelenburg te dinhmun a la chiang lo vek, Yannick Bolasie erawhin Blues a hmachhawn thei tura ngaih a ni thung - player ngaihven hlawh ber tur erawh tun hnaia par chhuang mek Wayne Rooney a ni.