Futsal League-ah hmelhriat leh hmelhriat loh!

January-a ṭan tur Mizoram Football Association Futsal League khel turin Mizorama footballer hmingthang tak takte an inziak lut hlawm a, chutihlaiin team ṭhenkhat chuan 'futsal player' a hranpaa neih an thlang a, Mizoram Premier League lama player ṭhaah an innghat lo.

MFA Futsal League mai a ni lo, league khel lo tur Division One champion IDBI, Tuikual team thlir pawhin player insem dan hi a 'mak' tawh hle. IDBI team hian Santosh Trophy probable-a tel player pathum - Laldampuia, Zothanmawia leh Lalremruata-te an kawl bakah MPL best defender nominee Thomas Lalengkima-te an nei a, MPL player langsar-te hian league khel tur club-a inziah luh aiin an 'futsal club' ngaia hun hman an thlang.

Football player ṭha tak takte futsal khel turin an inziak lut nual a, MPL best player ni tawh Malsawmfela leh R. Malsawmtluanga-te hming hmuh tur a awm a - MPL khelh zawh taka player langsarte chu an inziak lut nual mai.

Hetihlai hian an khelh tur hi football ni loin futsal a ni a, a game kalhmang a dan bakah khelmual a tê a, tharum aiin thiamna leh chet ran a pawimawh a, a kalhmang a inan loh avangin futsal khel thiam rawlthar rualte hmaah MLA-a player langsar kan hmuh ṭhinte an langsar bik kher lo mai thei.

January 5, 2018-ah MFA Futsal League kickoff a ni ang a, January 9-ah khelh ṭan a ni ang.