Man City an kal zel dawn?

Premier League hmahruaitu Manchester City-in zanin dar 8:30 hian Bournemouth an mikhual dawn. Pep Guardiola hote hian krismas vuakveta result ṭha an neih chhunzawm chuan point 11 ngawta an san fal tawh avangin English champion hriat nan nakkum May nghah thlen a ṭul kher lo ang.

A êng zual zel

City khelh danin fak a hlawh a, Blues striker hlui Roque Santa Cruz chuan, "Result hian engkim a tichiang a ni. A zawna vawi 16 chak hi a namai lo a, record chhuanawm tak a ni. Premier League inelna san zia ngaihtuah chuan an record hi a ropui lehzual," tiin a club hlui a fak. Pep Guardiola hote hian League Cup-ah semifinal an thleng tawh a, double leg-a khelh tur a nih avangin Championship club Bristol City lakah an vanduai theih a rinawm loh.

Spanish manager Pep berin nomawi pali 'quadruple' chawi a theih loh ti bur mah se tun dinhmunah chuan chumi tithei tur chuan theihna an nei a, player rotation a kal ṭhat theih nan league-a an dinhmun sawhnghet ran a ṭul bawk. City hian Bournemouth an hmachhawn zawhah Newcastle leh Crystal Palace te an hmachhawn dawn a, table a chanve hnuaia lama awm vek an ni.

Santa Cruz chuan, "December thla zawha an falna hi a pawimawh dawn. City hian record duhawm tak an siam chungin United lakah an la fal tawk lo a, kumin chhunga an result aṭang hian season tawpa an awmna tur chu a hriatthiam theih ang," tiin an khelh hmabak a pawimawh thu a sawi.

City tan khelmual pawn lamah pawh chanchin lawmawm a awm zel a, Manchester Derby-a buaina vangin hremna an tawk lo. Thuthang awm bawk chu Arsenal aṭanga an lakluh tum Alexis Sanchez an chan theih a rinawm a, amaherawhchu nakkum January-a an lakluh chuan team inrem khawm dik tawh a tihbuai theih avangin nipui bazar lamah a thlawna an lakluh a rinawm.

United an dam ṭan

United tan Paul Pogba a rawn let leh tawh a, French midfielder hmang hian Premier League hmahruaitu Manchester City nena inkar tih zim an tum ang. Jose Mourinho-a'n tlarhnung lamah pawh duh thlan tur player a nei chho zel a, champion an tum a nih chuan zanina an hmachhawn tur Leicester City lakah chetsual a thiang tawh lo.

Derby match zawhah Portuguese manager Mourinho a insum zo lo a, amaherawhchu, United boss hian hremna a pumpelh. Khelmual pawn boruak a sang a, English club a enkawl tirha 'The Special One' tiha inchhal Mourinho hian result ṭha a nei lo zel a nih chuan a ṭhatna ṭhin media hmaah pawh Spanish manager Pep-a hnuaiah a awm chho dawn a ni.