105-na nichungin India-in kum an khar
December 21 khan kumin chhunga FIFA ranking hnuhnung ber tihchhuah a ni a, India chuan 105-na dinhmun luah chungin kum 2017 an khar–Blue Tigers hian kum 2016 khan ranking-a 135-na nichungin kum an khar a, ranking lama hma an sawn dan hi chhuan tham a ni.
India-in kum tawpa FIFA ranking-a dinhmun an hauh san ber ṭum chu kum 1993 daih tawh khan a ni a, hemi kum hian khawvelah 100-na nichungin kum an khar. Asian Football Confederation (AFC) hnuaiah chuan India hi 15-na an ni a, an chungah hian FIFA ranking-a 101-na Oman leh 102-na Qatar an awm.
Top 100-ah hian world champion Germany-in an hmun ngai luahin pakhatna an nih chhunzawm zel a, Brazil chu pahnihna niin pathumnaah European champion Portugal an awm thung.
Sulhnu chhuanawm
Kum 2017 chhungin India-in tlawm hmel an hmu lo a, April-a FIFA ranking-a chhuah khan nasa takin hma an sawn–India hi hmun 31-in an zuang sang a, March thla chhung hian Cambodia leh Myanmar an hneh. May a thlen meuh chuan Indian football chanchin ziah danglamin a awm a, kum 21 hnua a vawi khat nan India chu top 100-ah an awm.
July a thlen meuh chuan India hi 96-na an ni a, August-ah hmun khata tawlh hnungin 97-na an ni a, September-ah erawh Stephen Constantine-a enkawl team hi top 100 pawnah hnawhchhuah niin 107-na an ni. India-in international match an khelh leh hmasak ber tur chu nakkumah March-ah a ni tawh a, Kyrgyz Republic chu AFC Asian Cup Qualifier-ah an lenchilh ang.
Zinkawng ngaihnawm
Kum 2017-ah India-in FIFA pawmpui international match pakua an khel a, vawi hnih an khingpui inhnehtawkpuiin vawi sarih hnehna an chang. He zinkawngah hian India-in goal 18 an khung a, goal sarih an chhuah thung–hetih hung chhunga India tana goal khung hnem ber chu captain Sunil Chhetri a ni a, Bengaluru FC striker hian goal nga a khung a, goal khat hi penalty aṭanga a khung a ni.
India-in kum 2011 hnua a vawi khat nan Asian Cup 2019 khel turin an inpet tling bawk a, qualifier match ruk khelh turah match nga khel tawhin vawi li an chak a, vawi khat an khingpui an inhnehtawkpui–India hian 1964, 1984 leh 2011 khan Asian Cup hi an lo khel tawh. Asian Cup khel tura India inpetkaina chu October 11-a Macau nena an inkhel kha a ni a, Bangalore khawpuia inkhelah India hi 4-1 in an chak–Jeje Lalpekhlua chuan he inkhelah hian goal khat a khung.
Mizo Tlangval
Kum 2017 chhungin India squad-ah Mizo tlangval Jeje Lalpekhlua chu player pawimawh a ni a, Hnahthial tlangval hian India-in match kua an khelhah a hmel a lan kim vek! Mizo zingah Jeje tih lohah chuan Jerry Lalrinzuala chu squad-a koh ngun zingah a tel a, match hnih a inlan.
Chennaiyin FC striker Jeje-a'n match kua a khelhah goal li khunga India tan player pawimawh dinhmun a luah laiin Mizo dang tan erawh chona a la sang hle. Kumina Mizo player India squad-a koh zingah East Bengal winger Laldanmawia Ralte, Pune City midfielder Isaac Vanmalsawma, Bengaluru FC striker Daniel Lalhlimpuia leh Kerala Blasters defender Lalruatthara te an tel a, an zingah hian official match-a inlan awmchhun chu Daniel-a chiah a ni.
Lawm tur a ni em?
India-in FIFA ranking-ah nasa takin hma a sawn a, Asian Cup an khel dawn a, hetichunga zawhna awm erawh Indian football team hmasawnna kawngah hian lawm tur a ni em? tih hi a ni. India-in match kua chhung tlawm hmel an hmu lo ngei a, chutihrual chuan international friendly match an khelhpuite hi FIFA ranking hnuai lam luahlum ṭhang Chambodia, Nepal, Mauritius leh Saint Kitts and Nevis te an ni.
Ranking a hniam lam team an hmachhawn miau avangin India tan hnehna chan 'chance' a sang a, chu chuan FIFA ranking-ah point a ken tel tho avangin India hi hmasawn miah si loin hmasawn angin a lang thei–coach Constantine-a player koh danin sawisel a hlawh bawk a, Sumeet Passi, Robin Singh, Anthony D'Souza leh Alen Deory te ho koh an nih laiin Lalrindika Ralte, R. Laldanmawia, Isaac Vanmalsawma leh C.K. Vineeth te koh an ni lo ṭhin chu Indian football hrechiangtute titi a ni.