Aizawl FC an tho chhuak thei dawn em?
I League champion lai Aizawl FC chuan December 27, Nilaini hian Rajiv Gandhi Stadium-ah league hmahruaitu Minerva Punjab an mikhual dawn a, he inkhel result hian an hmalam hun a hril thui tawh ang.
Mizo club AFC hian match thum aṭangin point li chiah an la hmu thei a, Minerva Punjab hian match nga aṭangin point 13 an hmu tawh.
Hei chauh hi ni loin Aizawl FC chungah Minerva bakah Kolkata club lian pahnih Mohun Bagan leh East Bengal, North East club dang pahnih Shillong Lajong leh Neroca te an awm a, nimin lam inkhel result a zirin Mizo club hi an la tlahniam leh thei bawk
Hmahruaitu Minerva
Minerva Punjab hian season liam ta khan I League an khel ṭan a, match 18 aṭangin point 13 chauh hlawh chhuak mah se pakuana niin season an khar a, I League khel zel turin an him chiah.
Tun season-ah erawh an mual Guru Nanak Stadium ṭhat tawk loh zar an zo a, an mualah result ṭha an neih zel avangin match nga lek aṭangin season liam taa an point hmuh zat an hmu der tawh.
Punjab club hian mualah match li khel tawhin Mohun Bagan nen an inhnehtawk nghal a, hemi hnu hian NEROCA FC, Chennai City leh Indian Arrows te an hneh a, an chakna erawh goal khat vek a ni.
Minerva hian khualmualah match khat chiah an la khel a, Indian Arrows chu 2-0 in an hneh. Season chanve em pawh la ral lo mah se Indian Arrows hi vawi hnih an hmachhawn tawh a, point 13 tehmeuh an hmuh tawh avangin champion thei zing aṭanga dah bo ngawt a rem tawh lo.
Vanneih leh vanduai
I League-ah hian team tin an intluk tawk a, vanneih leh vanduai kar a hla. Khalid Jamil hnuaiah Aizawl FC-in nomawi an chawi khan season tawpah Minerva nen point 24 tehmeuhin an inthlau a, khelmual chhungah erawh an intluk tawk viau thung.
Kumin January 13-a AFC-in Minerva an mikhual khan minute 90 chhungin goal a lut lo a, injury time minute linaah Minerva defender Loveday Enyinnaya-a'n an lama a tihluh zarah Aizawl FC an chak hram.
March 11-ah Aizawl FC-in Guru Nanak Stadium an tlawh khan 2-0 in hma hruai mah se Minerva lamin an si phurh an sut zo vek a, hun tawpah Mizo club zawk an talbuai a, 2-2 in inkhel a tawp.
Season tawpah erawh Aizawl FC-in nomawi an chawi a, an point hmuh zat thlirin thil engkim kal tluang veka ngaih theih ni mah se an chak dan zirchian erawh chuan kawng awlsam an zawh lo.
Kawng harsa zawk
Aizawl FC-in point thum hmuh theihna tura ngaih Shillong Lajong lakah point an hmu lo a, February thlaa fixtures hautak an hmachhawn hmain insiamṭhat a ṭul a, point bakah inrintawkna nei turin league hmahruaitu Minerva hneh chu an hna hmasa ber a ni.
Portuguese coach Paulo Meneses chuan, "Lajong kan hneh loh ṭuma phurna nei miah loa kan khel kha kei pawhin ka hrethiam lo a, kan khel ṭha lo a ni. Kan chak lohna aṭangin kan inzir a ṭul a, kan thawhchhuah ngei pawh a ṭul a ni. Mipui puihna kan sawm a, mipui ṭan tlaka khelh ngei kan tum," tiin insiam-
ṭhat an tum thu Vanglaini a hrilh.
ZoFooty statistics aṭanga thlirin AFC hian Churchill (325) an hneh ṭum aiin Lajong (356) ah ball pass dik an ngah zawk a, amaherawhchu Goan club an hmachhawn ṭum hian goal zawnah vawi 8 an pet theih laiin Shillong club lakah vawi li chiah an pet thei a, an tlarhma hriam tawk lo chu an buaina a ni.
AFC coach Paulo chuan, "David-a dam tawh a, Andrei pawh Lajong nen bench aṭangin a lut tawh. Training-naa an khelh ṭhat dan a zirin inkhel tur ka thlang ang," tiin Vanglaini a hrilh.
I League danah foreigner panga chiah playing eleven-ah dah theih a ni a, Romanian midfielder Andrei-a a inlan dawn chuan foreigner zinga tu emaw ber bench-ah an ṭhut ve a ngai dawn tihna a ni.
Engpawhnise Mizo mipui tana hriat nuam tur erawh Mizoram Premier League Season 6-a AFC khelh ṭhat ber lai chu David Lalrinmuana leh Andrei te an khelh dunin a ni a, player talent nei ṭha pahniha pakhat zawk pawh an awm loh chuan Aizawl FC-in an tuar tih phat rual a ni lo.
Engtin zel?
Aizawl FC-in ṭantu an mamawh a, inkhel entu an ṭha lo hle - hei vang hian club pawhin entu an tam theih nan ticket man pawh 50% in an tihniam.
Mizo club-in Mizo mipui inkhel en turin an ngen a, India rama Mizoram tihmingṭhatute ngenna hi tihhlawhtlinsak atan a ṭha hle - chutihlaiin inkhel en man tuk hmasak kha mipuiin an zo lo niin a lang.
Inkhelh hun hi December 27 a ni a, krismas ruai ṭheh tuk hun awl a ni. Aizawl FC erawh krismas vuakvetah hahdam hman an ni dawn lo a, December 31 hian Gokulam Kerala nen khualmualah an inhmachhawn leh dawn a ni.
I League Fixtures
Vawiin Inkhel Tur
2:00 PM Shillong Lajong Vs Neroca FC
December 26, Thawhlehni
2:00 PM Indian Arrows Vs Shillong Lajong
8:00 PM Churchill Brothers Vs Mohun Bagan
December 27, Nilaini
2:00 PM Aizawl FC Vs Minerva Punjab
8:00 PM East Bengal Vs Gokulam Kerala
December 29, Zirtawpni
5:30 PM Mohun Bagan Vs Indian Arrows
December 30, Inrinni
2:00 PM Neroca FC Vs East Bengal
December 31, Pathianni
2:00 PM Gokulam Kerala Vs Aizawl FC
January 2, Thawhlehni
2:00 PM Indian Arrows Vs East Bengal
8:00 PM Mohun Bagan Vs Chennai City
January 5, Zirtawpni
2:00 PM Neroca FC Vs Indian Arrows
5:30 PM Shillong Lajong Vs Chennai City