Arsenal tana khelh zel duh Wilshere

England midfielder Jack Wilshere chuan Arsenal tan hun rei zawk khelh zel a duh a, hun rei lote chhungin contract thar a ziah beisei a ni.

Kum 25 mi Wilshere hi hliam vangin a buai fo a, season hmasa khan Bournemouth lamah loan hmanga chhuahtir a ni hial. Arsene Wenger-a'n a theihna sang tak lantir turin club dang zawn a ngaih loh thu a sawi tawh a, tun season kal laiah match 15 khelhtir a ni tawh.

Nakkumah FIFA World Cup khelh tur a ni a, player tinin an khelh phakna hmuna awm an duh. Wilshere hian tun season tawp thleng bak Gunners tan contract a nei tawh lo a, tun hnaiah khelhna hmun a chan chhoh tak bawk avang­in contract a ziak ngei dawn ta niin a ngaih theih.

Kum 2008 aṭanga Arsenal tana khel tawh Wilshere chuan, "He hmuna awm zel hi ka duh, Arsenal hi hmun sang taka thlenpui ka duh a ni. Inbiakna neih mek a ni a, hun reilote chhungin inremna siamfel theih beisei a ni," tiin a sawi.

England manager Gareth Southgate chuan Wilshere hi Arsenal tan a inlan phak lo a nih chuan ram tana koh theih a nih loh thu a sawi, Wilshere hian Russia-ah an ram aiawha inlan ngei a duh a nih chuan Gunners tan inkhel bul ṭantu zinga a tel chhoh reng a pawimawh dawn a ni.