Wanyama a rawn kir hnai

Tottenham manager Mauricio Pochettino chuan a midfielder Victor Wanyama-a'n training a zawm tawh tih a sawi a, tunkar tawp hian la inpeih lo deuh mah se kar leh lamah chuan a inkhelh theih tawh tur thu a sawi.

August thla khan Premier League champion Chelsea lakah Spurs hi 2-1 in an tlawm a, he inkhelah hliam tuar Kenya international Wanyama hi tun thlengin a la inkhel thei lo zui.

Spurs manager Pochettino chuan, "Training a zawm leh hi thu lawmawm tak a ni, season hmasa khan player pawimawh berte zinga mi a ni a, tun season-ah pawh hmun pawimawh tak a luah lum thei lo hi channa a ni. Player pawimawh a nih avangin a inkhelh leh thuai theih kan duh," tiin a sawi.

Tottenham hian zanin dar 11:00-ah an chunga awm lai Burnley an lenchilh dawn a, he hunah hian kum 26 mi Wanyama hi an chhawr theih a la beisei awm loh. Mahse, December 26 zana Southampton an hmachhawn hunah chuan inlan thei ngei tawh tura beisei a ni.

Season hmasa khan Premier League-ah Spurs hian Chelsea chiah tluk loh an nei a, season tluanin Wanyama hi match hnih chiah awltir a ni - kuminah erawh hliam vangin a la inlan tam lo a, a club pawhin an tuar tih a chiang.

Argentine manager Poch kaihhruaina hnuaiah Spurs hian hma an sawn hle a, chutihrualin tun season-ah erawh White Hart Lane an siamṭhat avangin Wembley Stadium chu home match khelh nan an hmang a, an hmangthiam tawk lo.

League match 18 khelh tawhah point 31 hmuin table-ah pasarihna an ni mek a, hmahruaitu Manchester City an phak lohna chu point 21 zet a nih tawh avangin nomawi chawi ai chuan season thara Champions League khelh phak chu an thil tum lian a ni tawh ang.