Balotelli dinhmun a chiang lo

Liverpool striker hlui Mario Balotelli chuan Janaury transfer bazar inhawn hunah French Ligue 1 club Nice chhuahsan thut thei a nih thu a sawi a, a club hlui Manchester City a ngainat thu a sawi bawk.

Italy international Balotelli chuan, "Sulhnu ka nei nual a, an liam tawh. Ka sulhnu ṭhenkhat kha chu ka tleirawl zual laia mi a ni a, tun hnuah chuan a thleng nawn tawh lo ang," tiin player puitling a nih chhoh tawh thu a sawi.

Kum 27 mi Balotelli chuan sawi zawmin, "Club president hian European football kan khel phak lo a nih chuan ka hlawh tur ang an pek theih loh tur thu a sawi a, chuvangin ka agent Mino Raiola nen pawh ka hma hun chungchang kan sawi dun. Eng nge lo thleng dawn chu kan hre thuai ang," a ti.

Balotelli hian kum 2010-13 inkar khan Manchester City tan inelna hrang hrangah match 80 khelin goal 30 a khung a, chumi hnuah AC Milan, Liverpool leh Nice tan a khel kual leh tawh.

A club hlui City chungchang sawiin Balotelli chuan, "City kha ka ngaina, ka khelh tawhna zingah chuan club ṭha ber a ni a, a thlawn pawhin an tan chuan ka khel duh ang," a ti. Balotelli hian Pep Guardiola kaihhruaina hnuaia Man City hmasawn chhoh dan chu lawmawm a tih thu a sawi bawk.