Commonwealth Games thleng tur Birmingham

Ningani khan 2022 Commonwealth Games thleng tur khawpui hming puan a ni a, chuhbuaitu awm loin Birmingham chu thlan an ni. He games thlen nan hian pound maktaduai 750 vel sen a ni dawn a, London Olympic hnua Britain-in infiamna khawmpui liana an sum hman hnem berna tur a ni ang.

Commonwealth Games Federation (CGF) chuan September 30 thleng khan he infiamna khawmpui lian thleng tura dil theihna hun a hawng a, Britain khawpui pahnih zingah Liverpool aiin Birmingham chu ram aiawh tura tih an ni a, an thleng zui dawn ta a ni.

Birmingham mayor Andy Street chuan, "Kan tan chuan krismas thilpek lawmawm bik a ni," tiin Commonwealth Games an thlen tur chu an khawpui tan a hlut thu a sawi a, Prime Minister Theresa May pawhin lawmpuina thu a sawi bawk.