Bengaluru-in Jamshedpur an ngam lo

Ningani zan khan Indian Super League club thar pahnih Bengaluru FC leh Jamshedpur FC an inkhel a, a tawpa chungnung zawk chu mikhual team JFC an ni. Sree Kanteerava Stadium, Bengaluru-a inkhelah goal lut loin team pahnihin hun an hmang reng a, minute 90-naah mualneitu team-in penalty an chawi.

Goal khung loin team pahnih an ṭin mai dawn nia a lan hnuah Rahul Bheke chuan penalty area-ah Sameehg Doutie a ti tlu a, referee-in penalty spot a kawk. Jamshedpur tan Trindade Goncalves a lo pen chhuak a, Brazilian midfielder hian Gurpreet Singh Sandhu chu chiang zeta bumin goal-ah a chantir.

JFC tan Mizo rawlthar duhawm Jerry Mawihmingthanga'n inkhel bul a ṭan a, chawlhlawk hman a nih hnu lawkah Chanmari rawlthar hian Kervens Belfort tan ball duhthusam vawrh mah se Haiti international hian goal hlauhawmah a chantir thei lo–Belfort hian Jerry tan hian a siamsak ve bawk a, Mizoram Premier League chhul chhuak player hian goal-ah a chantir thei bik lo.

Bengaluru tan Lalthuammawia Ralte chuan bench lamah a hun a hmang a, Mizo hmel dang hmuh tur a awm lo.

Moment of the Match Subrata Paul, Jamshedpur FC
Winning Pass of the Match Harmanjot Khabra, Bengaluru FC
Fittest Player Tiri, Jamshedpur FC
Emerging Player Subhasish Bose, Bengaluru FC
Hero of the Match Miku, Bengaluru FC