Benzema-a'n ram tana inkhelh a chawlhsan - a lungawi lo em ni?
France striker Karim Benzema chuan twitter kaltlangin ram tana inkhelh a chawlhsan thu a puang a, kum 35 mi striker hi France jersey ha chung chuan kan hmu leh tawh dawn lo niin a lang.
Benzema hian ram tan match 97 khelin goal 37 a khung a, ram tana match 100 khel tling tura match thum bak mamawh tawh lo chunga ram tana inkhelh a chawlhsan hian mak tih a hlawh hle.
Real Madrid striker chuan, "Vawiin hun thleng tur hian thil tam tak ka paltlang a, ka thlen chinah hian ka lawm em em a ni. Ka thawnthu chu keimah ngeiin ka ziak a, tunah chuan a tawp dawn ta," a ti.
Benzema hi France World Cup squad-ah telh ni mah se, hliam vangin hawtir a ni a, Ballon d'Or chawimawina dawngtu striker tel loin Les Bleus hian final an lut tho a ni.
Thawnthu hlui
Benzema hian March 2007 khan Austria hmachhawnin, ram tana a match hmasa ber a khel a, football khawvela striker langsar ber pawl a nih zui avangin mi tam takin France tana ropuina tam tak khum turin an beisei.
Mahse, ram tana a khelhpui ṭhin Mathieu Valbuena dik lo taka an bumna chungchang thu avangin Benzema hi ram tana inkhel tura koh zui a ni lo a, April 2016 aṭanga 2020 thleng kha France squad-ah koh a ni leh tawh lo.
Benzema koh a nih loh chhung hian France-in Euro 2016 leh World Cup 2018 an khel a, Euro-ah hian final lutin, World Cup nomawi an chawi bawk a, Benzema thil chân hi a liantham hle.
Ram tan ko lo mah se Benzema-a'n Real tana chet ṭhat a ṭhulh lo a, khawvela striker hmuhnawm ber pawl a ni reng. Hei vang hian May 2021 khan Benzema hi France squad-ah koh kir a ni a, Euro 2020 khel zingah a tel.
Mahse maw...
France jersey ha chunga a lo kir leh hnuah Benzema hian ram tan match 16 khelin goal 10 zet a khung a, Les Bleus tan ani ang striker neih let hi malsawmna a ni - a phu ang ngeiin World Cup 2022 squad-ah pawh a tel.
Mahse, Benzema vanduai a kaltluang. Doha, Qatar-a an training hmasa berah French striker hi a inhliam nghal a, coach Didier Deschamps-a'n player inhliam kawl reng ṭulna a hriat loh avangin a hawtir.
French coach Deschamps hian Benzema thlakna tur koh a tum loh thu a sawi zui a, Real striker Benzema hian mipui laka thiam chan nan Deschamps hian a ko ve mai mai niah a ngai a, a lungawi lo.
Spanish media lar tak pakhat Libertad Digital-in an tarlan dan chuan Benzema hliam hi hliam na tak a ni hran lo a, Real Madrid-a kirtir a nih hian ni thum bak inenkawl a mamawh lo - mahse, hawtir a ni miau si.
Lungawi lohna chu
Benzema hian France squad-a awm chhunzawm a beisei a, World Cup chhunga a dam hman dawn tho avangin ram tana khelh a duh - mahse, Deschamps-a ngaihdan a ni tlat lo.
France chanchinbu lar L'Equipe-in an tarlan dan chuan, Benzema hian France squad a chhuahsan hnu khan France team nen an inbe chhunzawm tawh lo a, a ṭhiante a ngai vak lo niin a lang!
Benzema aiawhte chu France medical team-in an striker malpui hliam an enkawl danah an lungawi lo nia sawi a ni a, hetihlai hian France medical team lam hi Benzema-a'n a hliam a sawi ṭhat duh loh danah thil thup a nei niin an ngai thung.
A tawi zawnga sawi chuan Benzema leh France inkarah 'khi' a awm leh a, World Cup zawh rualin Real Madrid striker-in ram tana inkhelh a chawlhsan thu a puang.
En dawn lo!
Kum 35 mi Benzema hi Argentina leh France-in World Cup final an khelh dawn khan ram tana lo kir leh tur angin an sawi a, mahse, Benzema hian social media lamah hriatthiam theih takin a kir loh tur thu a sawi.
Argentina nena final an khelh hmain Deschamps pawhin hemi chungchangah hian zawhna a dawng a, thinrim takin a chhanglet - Benzema hi final-ah hmuh tur a awm lo a ni satliah lo a, inkhel pawh a hmunah a en lo!
Khawthlang media-ten an tarlan danin, France president Emmanuel Macron chuan Benzema hi Qatar-a final en puiah a sawm a, a duh a nih chuan a private jet-a chuang ve a, Qatar pan puiah a sawm.
Mahse, Benzema chuan an ram President sawmna meuh pawh hi a hnar a, tunah chuan ram tana inkhelh a chawlhsan thu a puang ta - kum 35 mi a nih tawh avangin a awm lo hran lo a, mahse, a chhehvel thawnthu tam tak avangin mak tih a hlawh ta a ni.