Zanin dar 1:30-ah Man United Vs Burnley
Manchester United chuan zanin dar 1:30 hian League Cup last 16-ah Burnley an hmachhawn dawn. Erik Ten Hag-a hoten Premier League-ah an hmelma Manchester City an el pha lo a, nomawi an duh a nih chuan League Cup hi an lak thutak a ṭul ang.
World Cup hnua Man United inkhelh hmasak ber tur a nih bakah Cristiano Ronaldo an chhuahtir hnua an match hmasa ber tur a nih avangin ngaihven a hlawh ang.
Ronaldo tel lo United
Khawvel player ropui ber anga mi ṭhahnem takin an ngaih Cristiano Ronaldo-a'n a beisei ang duhsakna a dawn tawk loh avangin Piers Morgan bulah a thinurna a hri thla a, hei hian ngawng lian tak a nei - Man United leh Ronaldo an inṭhen phah.
United hian Ronaldo aiawh tur an zawng mek a, January a thlen phawt loh chuan player an la la thei lo. Hemi a nih avang hian Ten Hag-a'n Ronaldo thlakna tur hi a neihsa aṭangin a zawn a ṭul.
Tlarhmaa awm tura ngaih chu Anthony Martial a ni a, inhliam vanga nih tur ang thleng phak lo French forward hi World Cup squad-ah telh a ni lo. Chutihrualin Man United-in League Cup last 16 an thlen theih nan Martial hi a pawimawh a, Aston Villa 4-2 a an hneh ṭumin goal hmahruai a khung.
Hriat tel tur erawh Martial hian elpui tur a nei vat dawn a, United tana player pawimawh ni turin a hun ṭha neih hman ṭangkai a ṭul ang.
Engtin zel?
World Cup neih zawh takah Man United-in player ṭhahnem tak an thawh a, Argentina tana nomawi chawitu Lisandro Martinez leh final-a vanduai Raphael Varane te an la inlan thei dawn lo.
Tlarhnungah England innghahna Harry Maguire a awm dawn a, English defender hi club captain a la ni reng tih theihnghilh loh a ṭha bawk.
Maguire kawppui tur hian Sweden captain Victor Lindelof a awm thei a, Aaron Wan-Bissaka leh Tyrell Malacia te mual sirah an awm thei. Goalkeeper bikah inhnialna a awm lo a, David de Gea a chiang.
Man United ṭantuten an ngaihven chu England tana khel pha lo Jadon Sancho chanchin a ni a, Borussia Dortmund winger hlui hi a inlan loh a rinawm zawk.
Denmark innghahna Christian Eriksen a chhawr theih dawn a, World Cup hmaa United player langsar ber Alejandro Garnacho chu en bik tur a ni. Garnacho hi Qatar-ah zin ve lo mah se match hnuhnung bera Fulham an hneh ṭumin injury time-ah chakna goal a khung.
Burnley lam hi
Man United khingpui tur Burnley hi Championship club an ni a, World Cup chawlh an neih rei loh avangin match hnih an nei leh tawh a, Premier League club aiin match fitness an nei ṭha zawk ang.
Clarets enkawltu hi Man City captain hlui Vicent Kompany a ni a, Championship hmahruaitu an nih avangin an tawh a khirh dawn. Match hnuhnung berah pawh Michael Carrick-a enkawl Middlesbrough chu player 10-a khel chungin 3-1 in an hneh.
Burnley hi League Cup-ah an la champion ngai lo a, mahse an duh ber chu League Cup champion hi a ni lo. Kompany hoten an duh ber chu season thara Premier League khelh a ni a, tunah hian kawng dik an zawh mek avangin United laka player an siksawi hret a nih pawhin a mak lo ang.
Man United tana khel lai World Cup champion-te
Sir Bobby Charlton (England, 1966)
John Connelly (England, 1966)
Nobby Stiles (England, 1966)
Paul Pogba (France, 2018)
Lisandro Martinez (Argentina, 2022)
Man United zawm hma emaw chhuahsan hnua World Cup champion-te
Fabien Barthez (France, 1998)
Laurent Blanc (France, 1998)
Kleberson (Brazil, 2002)
Gerard Pique (Spain, 2010)
Juan Mata (Spain, 2010)
Victor Valdes (Spain, 2010)
Bastian Schweinsteiger (Germany, 2014)
Raphael Varane (France, 2018)