Coman leh Tchouameni an diriam

World Cup final-a penalty hlahtu Kingsley Coman leh Aurelien Tchouameni te chuan an vun rawng vangin diriam an tawk. France player pahnih hian penalty an khung loh avangin nomawi an kawl lai an hum thei ta lo a ni.

Coman-a pet hi Argentina goalkeeper Emiliano Martinez chuan a lo dansak a, hei bakah hian Tchouameni chuan goal ban hrulah a pet chhuak, an ram Les Bleus hi 4-2 in an tlawm.

Social media lamah Coman leh Tchouameni te hian diriam an tawk nasa. Bayern Munich chuan an player Coman hi an chhan a, eng pawh tawk se an thlawp tlat tih an tarlang nghal bawk.

Bundesliga champion Bayern chuan, "FC Bayern chuan vun rawng vanga inhmuhsitna hi kan do tlat. Coman, i lamah kan ṭang tlat a nia. Infiamna bakah kan khawsak honaah vun rawng vanga inhmuhsitna hian hmun a chang tur a ni lo," an ti.

Euro 2020 final-a England an chak loh ṭum khan, penalty hlahtu Marcus Rashford, Jadon Sancho leh Bukayo Saka te pawhin an vun rawng vanga hmuhsitna hi an lo tawk tawh.