Ancelotti-a'n cham rih a tum

Real Madrid coach Carlo Ancelotti chuan a hna ngai chelh chhunzawm a tum a, ruahman dan chuan Spanish club lian hi June 2024 thla thleng a enkawl chhunzawm ang - Brazil enkawl tur anga thuthang awm chu a thleng dik mai dawn rih lo.

Italian manager hian hna hmabak a ngah, tunah hian La Liga, Spanish Super Cup leh Champions League title an kawl lai humhim tumin an bei mek a, heng bakah hian nakkum February thlaah Club World Cup an khel dawn bawk.

Tun hnai khan Ancelotti hi a contract hmang zo loa chhuak tur anga sawi a awm. Ancelotti chuan, "Ka hma hunah eng nge lo thleng dawn chu ka hre lo, tuman naktuka lo thleng tur sawi lawk theih a ni lo.

"Tun dinhmunah chuan Real Madrid-ah hian ka hlim, thil tum tam tak pawh ka nei. Ka contract hi June 30, 2024 thleng daih a ni a, eng emaw vanga Real Madrid hian min ban a nih loh chuan ka chhuak lo ang," tiin a sawi.

Real Madrid hian World Cup hnua an match hmasa chu December 30-ah an khel dawn. La Liga table-ah an hmelma Barcelona chu point hnihin an phak lo mek, chetsual a remchang lo ang.