Mac Allister chelh kan duh - Brighton

Brighton & Hove Albion chief executive Paul Barber chuan Argentina champion puitu midfielder Alexis Mac Allister chu a theih chhung chelh an tum thu a sawi. Kum 23 mi Mac Allister hian Seagulls-ah hian June 2025 thleng contract a nei a ni.

Paul Barber chuan, "World Cup-a a chet ṭhat avangin duhtu an ṭhahnem dawn tih kan hria a, amaherawhchu kan theih chhung chu chelh kan tum ang," tiin Mac Allister chungchang a sawi.

Brighton hian Chelsea lakah manager Graham Potter an chân a, nipui bazarah defender Marc Cucurella (£60m), midfielder Yves Bissouma (£25m) leh forward Neal Maupay (£15m) te chu an hralh bawk. Hei chauh hi a ni lo, June 2021 khan Ben White (£50m) chu Arsenal lakah an hralh a, January 2022 khan defender Dan Burn (£13m) chu Newcastle-ah an kaltir bawk.

Brighton chief executive Paul Barber chuan, "Keini aia club hausa an awm a, player-te an theihna sang zawka khelhtir thei an ni tih kan hre bawk. Mac Allister hi chu kum 23 mi ni chunga World Cup chawi thei a ni a, World Cup history-a goal pawimawh siamsaktu a ni bawk," tiin an player hi a chhuang hle.

Mac Allister hian January 2019 khan pound maktaduai 7-in Argentinos Juniors aṭangin Brighton hi a zawm a, hemi hnu hian loan hmangin Argentinos Juniors leh Boca Juniors-ah a kal. Brighton midfielder Alexis-a pa Carlos Mac Allister hi Argentina tan Diego Maradona te nen an khel ho a, a unau pahnih Francis leh Kevin te pawh professional footballer tho an ni.