Chennaiyin leh Blasters an inhnehtawk

Thawhṭanni zan khan Indian Super League inkhel pakhat a awm a, South Indian derby-ah Chennaiyin leh Kerala Blasters te chu 1-1 in an inhnehtawk.

Jawaharlal Nehru Stadium, Chennai-a inkhelah mikhual team tan Sahal Abdul Samad chuan minute 23-na lekah goal hmahruai a khung a, Vincy Barreto chuan minute 48-naah si phurh a sut.

Hun tawp thlengin goal dang a lut lo a, team pahnihin point khata lungawi an zir - match nga zet a zawna an chak hnuah Blasters an chak zo lo a, top four-ah erawh an la awm ve zel.

Chennaiyin hian Blasters an hmachhawn hmaa an match hnuhnung berah NorthEast United hmachhawnin, goal sarih an khung a, Kerala lakah erawh vawi 11 shot nei chungin goal khat chiah an khung.

Highlander laka goal sarih an khung zinga goal ngaa inrawlh Abdenasser El Khayati chu mak takin bench-ah dah a ni a, minute 70-naah luhtir ni mah se danglamna thlen turin hun a tam tawk tawh lo.

Germany international hlui Thomas Brdaric-a enkawl Chennaiyin hi table-ah pasarihna an ni mek a, khelh zat inangah palina Blasters-in point ngain an phak lo mek - semifinal khelh beiseina an la nei ve zel.

Indian Super League hi nizanah match a awm lo a, zaninah pawh inkhel a awm lo ang. Ningani zanah khelh chhunzawm leh tur a ni dawn a, Jamshedpur FC leh FC Goa te an intawng ang.

ISL hi Krismas vuakvetah pawh khelh a ni dawn a, Krismas ni tak erawh an chawl ang - December 30 thleng kumin atan match an khel ang a, January 2 zan aṭangin an khelh chhunzawm leh nghal dawn a ni.