Mi bik Kylian Mbappe kha maw...

World Cup khel phak nih a harsa, inelna hmachhawn phak nih hrim hrim pawh lawmna tur a ni a, final boruak phei chu player tam tak tan a boruak ringawt pawh khelh tham a tling - football inelna ngaihhlut ber a ni miau a, a mak hran lo.

Argentina leh France ten World Cup final hriatreng tawh tur an khel a, inkhel ropuiah hian Kylian Mbappe chuan player danglam bik a nihna a lantir, an ram Les Bleus chu champion pui zo ta chiah lo mah se, a sulhnu erawh kumkhuain a cham reng tawh ang.

Kum 23 mi Mbappe-a'n Argentina lakah hattrick a siam, ani hi England legend Geoff Hurst hnuah World Cup final-a hattrick siam leh thei hmasa ber a ni. Mizoram buai kuma thil thleng ang kha kuminah a rawn inher chhuak leh leh chauh tihna a ni.

A danglam
Mbappe-a'n Pele hnung a zui teuh hle. Brazil legend hian 1962 khan a vawi hnih nan World Cup nomawi a chawi, hetihlai hian kum 21 mi chauh a la ni - Mbappe duhthusam erawh Lionel Messi leh a ṭhianten an dansak.

Lusail Stadium-ah khan a tir lamah Mbappe kha a 'bo' tia sawi theih a ni, chawlhlawk hma khan vawi 11 chiah ball a tawk ve hman, second half tir lamah pawh thil hi a danglam tam chuang lem lo.

Minute 71-na a ni a, a vawi khat nan Mbappe-a''n goal khung turin a pet a, mahse hei pawh hi goal bar chungah a kal. France lam hi goal khung loin an mualpho zui dawn niin a lang hman a, a nihna takah chuan chhantu an nei lo a ni ber.

Mahse, Nicolas Otamendi-a'n box chhunga Randal Kolo Muani a tih tluk aṭang khan thil a danglam, penalty a chawi a nih kha. France beiseina chhetê la neih chhem nung turin Mbappe a rawn ding chhuak a, si phurh a sut ṭhen.

Goal luh aṭanga second 97 a thlen meuh chuan goal dang kan hmu zui. Kingsley Coman-a'n Messi ball chan lai a chhuhsak a, hemi kal zel hi Mbappe bawkin a khung, ball kang lai chu lei a thlen hmain a hlap lut pawp.

BBC co-commentator Jermaine Jenas chuan, "Player ropui bik chuan France beiseina a siamsak a, amaherawhchu a ṭhiante khan an thlawp ṭha tawk lo deuh ni maiah ka ngai," tiin a sawi a, a hunlai boruak ngaihtuah let chuan a thusawi hi a dik viau.

Mbappe hian extra time-ah Messi goal khung a sut leh bawk. Paris Saint Germain forward naupang zawk hian a upa zawk ropuina a hliah khuh ngei dawn niin a lang hman, penalty shootout-ah a khung bawk a nih kha.

Mahse, a zawna World Cup champion nih meuh chu a lo harsa. Khelhpui dangte thlawpna ṭha bakah, midang an khelh ṭhat ni a nih ve lem loh chuan Mbappe tan meuh pawh champion theih a ni bik lo, a thil tih erawh sawi nep a rem lo thung.

An khelh dan kha
A tawpah chuan France hi penalty hmanga chak lo an ni. Argentine keeper Emiliano Martinez khan Kingsley Coman-a pet a dansak bakah, Aurelien Tchouameni-a'n goal pawnah a pet chhuak bawk.

Inkhel pumpui thlir erawh chuan France hian a tir lamah thutlukna an siam fuh tawk lo niin a lang. Minute 60 thleng kha chuan goal hlauhawm pawh an nei thei lo, a tir lamah phei chuan Olivier Giroud leh Mbappe te thlengin goal an veng suau suau a ni ber.

Les Bleus boss Didier Deschamps a harh chhuak, striker Olivier Giroud leh Ousmane Dembele te la chhuakin Kolo Muani leh Marcus Thuram te a dah lut a, tlarhma laiah Mbappe a tal tam sawt - a hnuah Coman leh Eduardo Camavinga te a dah belh bawk.

Deschamps chuan, "Player ka thlak vat chhan kha chu khelh dan phung tih danglam ka duh vang a ni. Giroud leh Dembele te kha ka dem hran lo, ni danga 100% an pek ang an tih theih tawk loh vanga thlak ka ni.

"Mual sir aṭanga ka lo hmuh dan chuan kan team kha kan talbuai takzet, chumi chinfel dan tur ngaihtuah kha ka hna a ni. Tlarhma laia Kylian tal tamtir khan awmzia a nei ngei turah ka ngai a, chuvang chuan khelh dan phung ka thlak.

"Ka sawi fo tawh angin football-ah chuan theih loh a awm lo, tun ṭumah pawh khan ropui takin kan kir leh thei a nih kha, a pawi ber lai erawh kan duhthusam anga inkhel a tawp thei ta lo kha a ni a, kan pawm thiam a ngai," tiin a sawi.

France hma hun an zawhna chhang zuiin Deschamps chuan, "Player ṭha tak tak kan ngah, tuna awmsa bakah naupang zawk rawn chhuak chho tur an awm, kan ram hmalam hunah chuan lungngaihna tur a awm lo," a ti.

France mipui tam tak pawhin Messi kha World Cup champion turin an duhsak, an ram kha champion tura an duh zawk chu ni tho mah se Paris Saint Germain player ngeiin hlawhtlinna a chan avangin Paris khawpuia Messi a kir hunah pawh lawm takin an dawnsawn a rinawm.