Djokovic nena inel châk Alcaraz

Mipa tennis world number 1 Carlos Alcaraz chuan player ṭha bikte a inkhelhpui hma chu nihlawh a in tih thu a sawi a, season thartir lama khelh tur Australian Open-ah Novak Djokovic a tel thei tur chu a lawm thu a sawi chhuak.

Serbian star Djokovic hian kumina khelh Grand Slam pali zinga pahnih chu a khel thei lo. Melbourne khawpuiah a zin thei lo a, hei bakah hian Covid 19 laka invenna a lak loh avang bawkin US Open pawh a khel thei lo.

Kum 19 mi Alcaraz hian Novak-a inkhelh tam loh chu a lo chhawr hle, a elpui hautak tur tak a inkhelh tam loh avangin a ranking a sawhnghet ṭha hle a, number 1 ni chungin kum tawp pawh a hmang thei hial.

Spanish rawlthar Alcaraz chuan, "Tunlai tennis vanneihna chu khawvel player ṭha ber ber a kawl hi a ni. Player ṭha bikte ka khelhpui ve hman hi ka lawm, anni nena tournament kan khel ho thei hi nakinah inchhuang takin kan la sawi ang.

"Theih ni se chuan Novak hian tournament zawng zawng khel ve tawh se ka duh, a ṭha ber nih kan duha kan tum a nih chuan khawvela a ṭha bikte nen kan inkhel tur a ni, season thara kan inkhel ho thei tur hi ka lawm," a ti.

Thla hmasaa khelh Paris Masters-ah khan Alcaraz hi pum nuam lo vangin a inhnukdawk a, a hnu lama inelna a hmachhawn tur ATP Finals leh Davis Cup pawh a khel thei lo, tunah erawh inkhel turin a inpeih leh ta.

Alcaraz chuan, "Ngaiawh leh turin thla khat lai hun ka mamawh, tunah chuan ka taksa pawh tennis khel turin 100%-in a inpeih leh tawh e," tiin a sawi, tun kartawp hian Abu Dhabi-ah match hnih a khel ang.

December thla a zo hnai a, season thar an ṭan leh thuai dawn. January 16 aṭangin Melbourne khawpuiah Grand Slam hmasa ber Australian Open an khel ṭan leh tawh dawn a ni.