Mangṭha World Cup - Liverpool vs City-in min hmuak

Khawvela ennawm ropui ber ang hiala an chhal World Cup kan thlah a, English football hmuhnawm tak en tur kan nei lehnghal dawn - zanin dar 1:30 hian League Cup round of 16-ah Manchester City chuan Liverpool an mikhual dawn.

Manchester City hi tun hmain club lian tia chhal ni ngai lo mah se, sum an ngah thar hnuah English football an thunun a, hei vang hian Jurgen Klopp hoa hmana an ropuina neih let tum Liverpool nen an inhal hle.

Zanin an intawng tur pawh a boruak a 'hot' dawn a, hei hi club pahnih pawhin an hai lo - zanin inkhelah fan-te chu buaina siam zawnga che lo turin an chah a, thuchhuah inṭawm an siam hial.

Chutiang boruak karah chuan club inhal pahnih zaninah an intawng dawn a, inkhel a hmuhnawm loh ring suh - football ngainatute tan tunlai chu 'Krismas' ang char char a ni ber e!

Fimkhur a ngai
Liverpool leh City intawn hnuhnung ber chu October kha a ni a, Premier League match-ah mualneitu Reds hi 1-0 in an chak. Mahse, inkhelh zawh hnuah chanchin sawi zui tur a awm a, a ṭha lo lam a ni.

City boss Pep Guardiola chuan Anfield-a fans ṭhenkhatin pawisa thira an vawm thu a sawi a, hetihlai hian Liverpool chuan City fan-ten ṭawngkam mawi lo hmanga an player-te an au el nasat thu an sawi ve bawk.

Hei chauh a ni lo, City bus hma lam darthlalang chu fan-ten an vawm chhiatsak nia sawi a ni bawk a, City hi an inkhelh hmaa Jurgen Klopp-a ṭawngkam avangin an lungawi lo hle nia sawi a awm bawk - thil thleng a tam hle!

Klopp hian City sum hman dan chungchang a sawi a, hei hi City lamin an ngai hua a, German coach hian a hnuah a thusawi chu ramdang mi huatna lam hawi a nih loh thu a sawi. Liverpool-in Champions League, April 2018-a City an hneh ṭumin City bus chuan beih a lo tawk tawh bawk.

Insum rawh u
Zaninah pawh team pahnih inkar boruak a 'hot' leh dawn tih a chiang a, club thuneituten Etihad Stadium-ah buaina a chhuah an hlau - hei vang hian Liverpool chief executive Billy Hogan leh City chief executive Ferran Soriano te chuan thuchhuah inṭawm an siam.

Club pahnih chuan, "Anfield a ni emaw, Etihad Stadium emaw pawh ni se, fan-te phurna leh thathona hian keini club pahnih inhmachhawn hi a tihlu zual ṭhin. Stadium boruak nuam tak, mi zawng zawng nuam ti taka an awm theihna tur siam in duh tih kan hria.

"Mahse, tun hnai thil thlengah, fans tlemtê ṭhenkhat avangin kan game timawi lo thei thil thleng a awm a, hei vang hian fan-te chu hetiang boruak duhawm lo a thlen tawh loh nana min pui turin kan ngen che u a ni," an ti.

Liverpool leh City chuan, "Hetiang anga nungchang mawi lo lantir an awm chuan, khawngaih taka min hriattir thuai turin kan ngen che u a ni," an ti zui a, fan-te chu thawhpuiah sawmin, boruak ṭha lo siam thei thil nuai bo tura theihtawp an chhuah zui tur thu an sawi bawk.

Khelmual lam
Club pahnihin thuchhuah inṭawm siam lawk ngai meuh khawpin club pahnih inkar boruak a sang a, zaninah World Cup khelh chauh vangin club pahnihin an player langsar zawng zawng rawn thawhchhuahpui thei kher dawn lo mah se inkhel boruak a sang ang.

Pep Guardiola leh Jurgen Klopp ten Premier League an ngaihtuah tel lo thei lo - Liverpool hian December 26 zanah Aston Villa an lenchilh dawn a, December 28 zanah Manchester City-in Leeds United an lenchilh dawn thung.

Hetiang a nih avang hian coach pahnih tan World Cup khel zo hlim player lo chhawr hah nghal hi a fuh lo ve thei a, zaninah player la inlan tam lo zawkte kan hmu a nih pawhin a mak lo ang.

Chuti a nih chuan City-in Kyle Walker, Phil Foden, Jack Grealish, John Stones, Kalvin Phillips, Ederson, Ruben Dias, Bernardo Silva leh Joao Cancelo te ho an la chawlh hahdamtirin a rinawm a, Reds lamah Ibrahima Konate, Virgil van Dijk, Alisson, Fabinho, Trent Alexander-Arnold leh Jordan Henderson te tan inlan turin a la hma mah mah mai thei bawk.

Mahse maw...
Club pahnih squad a chhah ṭha a, World Cup khelh vanga inlan lo tura ngaih awm nual mah se inkhel hmuhnawm tak pho chhuak tur khawpin player an la nei ṭha tawk.

City tan tlarhmaah Erling Haaland a la inlan thei dawn cheu a, Riyad Mahrez a la awm bawk - World Cup aṭanga tla hma, German midfielder Ilkay Gundogan leh Belgium thiampuipa Kevin De Bruyne te pawh manganpui tham an la ni.

Liverpool-in World Cup khel chau bakah hliam vangin Diogo Jota, Arthur leh Luis Diaz te chhawr thei lo mah se manganna tur niin a lang lo a, tlarhmaah Mohamed Salah leh Roberto Firmino ringawt pawh thlamuanpui tham an la tling.

Reds hian World Cup khel chau ve lo zingah midfielder Thiago Alcântara leh Alex Oxlade-Chamberlain, defender Joe Gomez te ho an la nei a, zanina inkhel hmuhnawm chhawp thei tur khawp chu an la nei - a hmuhnawm ang.