Rajasthan lakah Aizawl FC an tlawm

Aizawl FC-in I League-ah an result ṭha an chhunzawm thei lo. Mizo club hian RG Stadium-ah Kenkre 4-0 in sawp mah se Dr. Ambedkar Stadium-ah Rajasthan FC 1-0 in an hneh lo. Nilaini zan inkhela goal awmchhun hi Aizawl FC defender Akito Saito-a'n an lama a tihluh a ni.

Rajasthan-in an elpui Mizo club an hneh avangin point 14 hmuin panganaah an invawrh chho a, Aizawl FC erawh point 12 hmuin pariatnaah an tla thla thung. Vawiin hian I League match hnih a awm leh ang a, hemi zawh hian chawlh rih a ni dawn. Mizo club inlan leh hmasa ber tur chu January 9, Thawhṭanni a ni a, tlai dar 4:30-ah Real Kashmir an hmachhawn ang.

Own goal a pawi
Rajasthan-in bul an ṭan ṭha a, ṭan phat aṭangin goal khung tumin na takin Aizawl FC tlarhnung an nawr tawm. Dr. Ambedkar Stadium-ah Rajasthan foreigner pahnih captain Martín Chaves leh Joseba Beitia te thiamzia pholanin a awm.

Minute thumna lekah Spanish midfielder Betia ball fing chu Uruguayan forward Chavez-a'n a um lut a, cross ball ṭha tak nei mah se hnai tak aṭangin Hardik Bhatt-a'n a hlah.

Minute 10-naah Lalremsanga Fanai chuan dinglam aṭanga cross chhoin crossbar a pet per a, Lengpui tlangval hian a club hlui lakah goal a khung teuh hle. Aizawl FC an vannei reng ta bik lo a, minute 12-naah Rajasthan an vannei ta thung.

Rajasthan forward Chavez-a'n vei lam aṭanga ball lalutin a cross ball chu Aizawl FC defender Akito Saito-a'n a dan per avangin keeper Lalmuansanga'n a chhuah.

A goal belh lo
Second half ṭantirhah pawh Rajasthan bawk an hlauhawm a, Remsanga cross ṭha chu AFC keeper Muansanga'n ṭha takin a dang. Mizo club striker David Lalhlansanga pawhin chance ṭha a nei a, keeper Mohammad Sardar-a'n a dan hnuah substitute Jeremy Laldinpuia'n goal-ah chantir mah se offside vangin pawm a ni lo.

Mizo club-in chance ṭha dang an nei a, Matias Veron-a'n dinglam aṭanga ball a lakluh hnuah a ball cross chu David-a'n a tlawh hman lo. Hun tawpah erawh Aizawl FC-in goal dang an chhuah belh loh avangin an vannei ta zawk. Uruguay forward Chavez-a'n khalh tlang mah se a duhtui hret avangin captain Lalchhawnkima'n a dansak hman.

December 20, Thawhlehni
Churchill Brothers 6 - 1 Trau
CCB : Abdoulaye Sane 3', 33'; Tana 35'; Anil Gaonkar 45+3'; Yemdremban Singh 90' (OG); Kamo Bayi 90+4'
TRA : Bikash Singh 20'
Rajasthan FC 1 - 0 Aizawl FC
RFC : Akito Saito 12' (OG)

Vawiin Inkhel Tur
Sudeva Delhi 2:00 PM Mohammedan SC
Kenkre 4:30 PM Real Kashmir