United-in Rashford-a contract an pawtsei

Manchester United chuan nipuia contract hmang zo mai tur, kum khat dang pawhsei theihna dan an neih player palite chu season khat atan an contract an pawhsei sak a, an zingah hian Marcus Rashford pawh a tel.

United manager Erik ten Hag chuan kar hmasa lawk khan Rashford-a contract hi an pawhsei tur thu a lo sawi tawh a, ani bakah hian England international Luke Shaw, Portugal defender Diogo Dalot leh Brazilian midfielder Fred te pawh an contract an pawtsei a ni.

Red Devils player zingah goalkeeper David de Gea pawhin nipui transfer-ah a contract a hmang zo dawn a, Spanish keeper hi United-in chelh duh mah se he thu buatsaih a nih lai hian an la inrem lo.

De Gea hian kar khatah £375,000 a hlawh mek a, kum 2019-a he contract a ziah khan, a contract pangngai zawh huna kum khat dang contract a pawtsei a nih pawhin kar khata £375,000 a hlawh tur thu a inziak tel.

Mahse, Red Devils hian an first choice keeper hi a hlawh tihniam a, contract thar ziahpui an duh a, De Gea hian hlawh tihhniam hi a pawi ti dawn lo niin an sawi.

United hian December thla ral hmaa De Gea hi contract thar an ziahpui thei lo a nih chuan, kum 32 mi keeper hian season tawpa free transfer-a chhuak turin a duh ang club be turin zalenna a nei ang.

Manchester United hian nizan dar 1:30 khan Burnley nen League Cup round of 16 match an khel a, he thu buatsaih a nih lai hian an result kan hre hman lo.