Newcastle, Wolves, Saints leh Foxes an tlang

World Cup an zo fel a, hun rei lote hnuah European football a lo kir leh nghal. Thawhlehni zan khan League Cup fourth round khelh niin - Premier League club hrang hrangten hnehna an chang.

Newcastle United, Wolverhampton Wanderers, Southampton leh Leicester City te chuan an khingpui ṭheuh hnehin quarterfinal an lut a, zaninah EPL champion Manchester City leh Liverpool te an inhmachhawn ve leh bawk dawn a ni.

Magpies an chak
Manager Eddie Howe-a'n nomawi eng maw tal chawi ngei a tum. Bournemouth lakah Newcastle manager Howe hian World Cup khela feh chhuak a player-te a chhawr lehnghal, defender Kieran Trippier, forward Callum Wilson leh midfielder Bruno Guimaraes te an inlan vek.

St James' Park-a inkhelah entu 51,579 zet an pungkhawm a, season duhawm an hman mek avangin Magpies ṭantute an phur viau hi a mak hran lo, amaherawhchu an sa huai ser mah se Premier League club hian goal an khung thei mai bik lo.

Cherries goalkeeper Mark Travers-a'n Trippier khung tur ṭha zetin a dansak a, ani bakah hian Schar, Miguel Almiron leh Wilson ten an hun ṭha an bawhpelh vek, minute 67-naah Adam Smith chuan inkhela goal awmchhun a khung.

Newcastle United hian kum 2015 hnua a vawi khat nan quarterfinal an lut, kum 1975-76 season daih tawh khan final-ah an tlawm tawh bawk. Neitu thar an neih hnuah kumin hian Howe hoin nomawi an beisei mek.

Foxes an hriam
Leicester City chuan Youri Tielemans, Ayoze Perez leh Jamie Vardy te goal hmangin Milton Keynes Dons 3-0 in an hneh a, harsatna lian tham tawk loin League Cup quarterfinal an inhlangkai.

Leicester assistant manager Chris Davies chuan, "Tuna kan result hian Premier League kan khelh leh turah nghawng ṭha tak a neih theih ngei ka beisei, season tir lama kan chet fuh lohna siamṭha tur a ni turah kan ngai bawk.

"Hun rei tak kan chawl a, chutihrualin inelna kan hmachhawn loh lai pawhin ngawrh takin training kan nei reng, chu chuan rah ṭha a rawn chhuah niah kan ngai, thawhhona ṭha khan rah ṭha a chhuah," tiin a sawi.

Foxes tan James Maddison a la inlan thei lo thung. England midfielder hian hliam vangin World Cup pawh a khel thei lo. December 26-ah Newcastle United nen Premier League an khel dawn, hetih hunah chuan Maddison hi lo kir hman turin an beisei.

Wolves leh Saints
Julen Lopetegui-a'n Wolverhampton Wanderers a enkawl ṭan a, a hna hmasa ber chu ṭha takin a hlen chhuak. Spanish coach enkawl Wolves hian Raul Jimenez leh Rayan Ait-Nouri te hmangin Gillingham chu 2-0 in an hneh.

Wolves hi Premier League mawngphah luahtu an ni mek, manager thar Lopetegui tan hna a hautak dawn. Lopetegui chuan, "Hetiang inkhel hi chu a awlsam lo, chak loh hlau miah lo hmachhawn hi chu a harsa zel, kan chak thei hi a lawmawm," a ti.

Boxing Day-ah Wolves hian Everton an tlawh dawn, an khingpui tur hi anmahni anga thoa Premier League table mawng lama talbuai lai an ni a, point hmuh mamawh em em pahnih an nih avangin an inkhel a hmuhnawm ang.

Fourth round inkhel dangah Southampton an chesual teuh hle, minute hnihna lekah Gavin Bazunu-a'n anmahni lamah a ti lut. Mahse, Saints hian Che Adams-a goal hnih hmanga chhang letin Lincoln City chu 2-1 in an hneh.

Inkhel Results
Newcastle United 1 - 0 Bournemouth
NEW: Adam Smith 67' (OG)
Milton Keynes Dons 0 - 3 Leicester City
LEI: Youri Tielemans 18'; Ayoze Perez 29'; Jamie Vardy 50'
Southampton 2 - 1 Lincoln City
SOU: Che Adams 25', 74'
LIN: Gavin Bazunu 2' (OG)
Wolves 2 - 0 Gillingham
WOL: Raul Jimenez 77'; Rayan Ait-Nouri 90+1'