A tir aṭangin kan ṭang nghal dawn - Russell

Mercedes driver George Russell chuan season tharah thapui an thawh nghal tur thu a sawi a, intlansiak hmasa berah hnehna chan nghal tuma an beih tur thu a sawi chhuak.

Season hmasa khan Mercedes hian beisei an phak lo. Sao Paulo Grand Prix-ah Russell hian hnehna a chang a, intlansiak dang zawngah chuan Mercedes hian hnehna an chang miah lo - Lewis Hamilton meuh pawh a chak zo lo vek tihna a ni.

Driver championship lamah palina Russell chuan, "Kan team hian car chak leh ṭha zawk siam dan an theihnghilh thut lo ang tih hi thil chiang a ni, season hmasa lamah erawh kha chuan tihfuh tawk loh deuh chu kan nei niin a lang.

"Kum a thar ang a, engkim a danglam ngei turah kan ngai. Red Bull leh Ferrari hnungah kan awm tih chu kan pawm, season tharah chuan hetiang reng hi a ni bik lo ang, a hmasa ber aṭangin chak nghal kan tum dawn," a ti.