Santosh Trophy-a Mizoram aiawh tur a chiang ta ; Mizoramin Santosh Trophy khel turin Kerala pan dawn

Mizoram Football Association chuan nimin khan Santosh Trophy vawi 76-naa Mizoram aiawh tur player 22 hming an puang a, vawiin hian Mizoram team-in inelna neihna tur Kerala an pan ang.

Mizoram hi group II-ah Kerala, Rajasthan, Bihar, Andhra Pradesh leh Jammu & Kashmir te nen group khatah an awm a, vawi khat inkhelh kuala ti ṭha berin final round an lut dawn. Team 36 chu group parukah ṭhen hran an ni a, pahnihna zinga ti ṭha paliin final round an khel bawk ang.

Group II hi Khozikode-ah khelh a ni dawn a, inelna thlengtu Kerala hi football ngaina state an nih avangin Mizoram tan final round luh hi a awlsam dawn lo. Mizoram manager K. Lalenghluna chuan, "MFA-in min duat a, bungrua pawh kan dawng ṭhat ber ṭum a ni ang," tiin Vanglaini a hrilh.

Mizoram hian thlawhtheihna hmangin vawiin chawhnu dar 2:00 hian Kolkata an pan ang a, heta ṭang hian train-in Bengaluru an pan leh dawn. Bengaluru aṭangin inelna neihna hmun Khozikode hi bus-in an pan ang a, December 24-ah an thlen beisei a ni. December 27, Thawhlehniah Mizoram hian match hmasa berah Andhra Pradesh an hmachhawn ang.

Mizoram squad 22 zingah MPL player 20 an tel a, Mizoram inelna sang bera tel lo pahnih an awm. Chennayin FC reserve forward Joseph Lalvenhima hi kumina neih zawh tak NorthEast Olympic-ah khan goal nga khungin top scorer a ni. Vaseikai tlangval Joseph Lalmuanawma hi right back a ni a, kumin June thlaa neih Khelo India Youth Games-ah khan Mizoram captain niin gold medal lakna kawngah player pawimawh a ni.

Mizoram squad-ah hian MPL neih zawh taka top scorer leh best forward MC Malsawmzuala a tel lo. Manager Maenga chuan, "MC-a chauh ni loin MPL-a khel ṭha player-te chu koh vek an ni a, hliam vang leh harsatna dang vangin an tel thei lo a, pawi kan ti hle," tiin Vanglaini a hrilh.

Santosh Trophy hnuhnung berah khan Mizoram hian final round an lut pha lo a, qualifier match hnuhnung berah Manipur lakah point khat hmuh tawk mah se an chak lo. Final round an khelh loh avangin National Games an khel pha lo a, India rama football inkhelh thiam ber ni turin Mizoram tan final round thlen chauh ni loin nomawi chawi a ṭul.