Jamshedpur khelmualah FC Goa

Zan hnih chawlh a nih hnuah Indian Super League chu zanin dar 7:30-ah khelh chhunzawm a ni leh tawh dawn a, Jamshedpur FC chuan FC Goa an mikhual dawn.

Jamshedpur hian season hmasa khan league round-a hmahruaitu ni chungin league season an khar a, playoff hial an khel - tun season-ah erawh thawnthu a danglam ta hle.

Men of Steel hian league match 10 an khelh tawhah vawi khat chiah hnehna an la chang a, vawi khat an khingpui inhnehtawkpuiin, vawi riat an tlawm tawh!

Jamshedpur hian table-ah 10-na dinhmun an luah mek a, an hnuaiah hian match 10 an khelh tawha la tlawm vek NorthEast United chiah an awm - inchhuanna tur an nei tlem hle.

Mizo tlangval Ricky Lallawmawma leh Laldinliana Renthlei ten hmun pawimawh an channa club Jamshedpur hian semifinal khelh an beisei dawn a nih chuan tlawm a thiang tawh lo.

Goa erawh semifinal khelh beiseina nung takin an la nei reng a, league match 10 an khelh tawh aṭanga point 18 neiin, table-ah parukna an ni mek a, palina Kerala Blasters chu point khat chiahin an phak lo.

FC Goa hian match hnih a zawna Bengaluru (2-0) leh Mumbai City (4-1) an ngam loh hnuin match hnih chu a zawnin hnehna an chang leh tawh a, Odisha (3-0) leh NorthEast United (2-1) an hneh.

Aizawl FC academy chhuak, Mizoram player Ayush Dev Chhetri-a'n hmun pawimawh a channa FC Goa hi an phur vanglai tak a ni a, Jamshedpur tan insiamṭhat a awlsam lo ang.