BBC Award dawngtu Messi

World Cup-a Argentina champion puitu, La Albiceleste captain Lionel Messi chu BBC Sports Personality's World Sport Star of the Year (2022) atan thlan a ni a, he award hi kum khat chhunga infiamna khawvela player che ṭha bera an ngaih hnenah BBC ruat mithiam bikte chuan an thlang chhuak ṭhin - nikum khan Irish sakawr chung chuan thiam Rachael Blackmore chuan a dawng.

Kum 35 mi Messi hian World Cup nomawi a chawi mai a ni lo a, goal sarih ngawt khungin assist vawi thum a nei a, inelnaa player ṭha berah thlangin Golden Ball hlan a ni - kum 2014 khan he award hi a lo dawng tawh bawk.

Khawvela footballer ṭha ber chawimawina, Ballons d'Or vawi sarih dawng tawhtu Messi hian Champions League (4), La Liga (10), Ligue 1 (1) leh Copa America (1) nomawi a lo chawi tawh bawk a, inelna a telna apiangah nomawi a chawi zel.

April thla khan Messi hian Ligue 1 nomawi hi a chawi a, tun season kal mekah French club tan match 19 khelin goal 12 a khung leh der tawh a, assist vawi 14 a nei mek - kum 35-ah pawh khawvela footballer ngaihven hlawh ber pawl a la ni reng.