Silly Point ; MESSI 10DULKAR
“Messi nen hian inanna deuh kan nei a, ka milpui a ni," tia Indian cricket pathian Sachin Tendulkar-a'n hmana a lo sawi chu, zawlnei ni awm ang ziazangin a lo thleng dik ta. Ni e, an infiamna tualzawlah ve ve zawng 'ropui ber' tia chhal ngam an ni hial awm e.
90s leh 2000s chhoa India mi leh sa tan chuan, khawvel hmuha hmai han uan vena tur hi a vang khawp. India mipui tluklehdingawn hmela hlimna leh lawmna thlen thei awmchhun leh khawvel hmuhah Hindustan hi a awm ve a ni tih phochhuak thei awmchhun chu kha 5ft 2in leka sang, a sakhming an phuah Sachin Ramesh Tendulkar kha a ni tlat.
Chutiang bawkin Mizoramin state nihna kan chan ve kum 1986 khan Maradona hoin Argentina chu khawvel champion an ni a, tunah erawh ṭhanghnih lian zet a liam tawh a, hmanlai thawnthu angah a chang zo tawh. Mipui vaibelchhe li leh a chanve awmna Argentina hi ram chhuanawm a ni bik lo - political dinhmun chiri, economy chhe tulh tulh, eiruk leh hlemhletna boruak kara leng a ni. An ram dinmhmun hrehawm tak aṭanga hlimna kawl êng rawn pe thei, an beisei leh nghahfak awmchhun 'Messia' chu an fakpa rangkachak feet nga leh inchi sarih leka sang Lionel Messi hi a ni tlat.
An lian lo - an te
Tendulkar leh Messi te hi tleirawl tirh aṭanga titi lengvak a 'mi cial' nihna lo nei dun tawh, tui dang engmah nei lo mah se khuanuin an ball vuak leh ball pet thiam talent hmanga khawvel arsi lian ni tura a lo duante pahnih zingkawng hi a namai lo hle.
Pakhat hi fast bowler nih tum, a pumruain a tling ngang loh vanga a vuak lama ṭuan ta a nih laiin, South American rawlthar erawh ṭhan theih lohna natna a neih avanga ni tin mai damdawi man to taka injection lak ngai a ni thung. Fanau malsawmna avanga hlimna aia nu leh pa bianga lungngaihna mittui sur hnem tirtu a ni fo awm e.
An 'te' ber tawp lo
Chutianga haider rual loh talent bik nei ta chu, biak in puia inkhawm rual an nih hma hauh aṭangin professional infiamna khawvela dah luh an ni nghal.
Khawvela rawlthar tamzawkte nu leh pa thlazar hnuaia lungmuang taka an la awm hunlai kum 17 mi ve ve niin, puitling zingah khawsak tir nghal an ni a, mahse kawlawbela sangha khawi, lui liana thlak thut, harsatna nei miah lo ang maia lim nghal ziak ziak ang an ni ber awm e.
A kim lo,
World Cup tel lo chuan!
Kum 20 dawn India mipui tluklehdingawn innghahna leh beiseina, chawimawina leh record ropui dang zawng zawng kawltu Sachin Tendulkar chuan World Cup ṭum nga zet a lo hmachhawn tawha hlawhtlinna a hmel a la hmu lo a, a kim thei mawlh lo. Chutiang bawkin kum 18 chhung professional football a luhchilh hnuah mimal leh club anga hui theih zawng zawng chawimawina huitu Lionel Messi tan, famkim lo khawvela famkimna hnaih bertu tan takngial pawn, World Cup nomawi hi a famkim lohna a ni hlen ve dawn te pawh a ang zo tawh!
2003 ICC World Cup final-ah, Australia vanglai laka Sachin a leh a naute dawl zawrin an zawr tawh a, chutiang bawkin FIFA 2014 World Cup final-ah team ṭha zawk Germany lakah silver medal hlawhchhuaha lungawi mai Messi leh a ṭhiante tan a ngai si.
Khuanu bel ruat
ICC World Cup 2011 leh FIFA World Cup 2022 hun a lo inher chhuak ve leh a, zep thu a cheng lo, kum hlun lo khawvelah hian Pathian tluka kan ngaihte pawhin vanglai an lo pelh hun a lo inherchhuak lo thei si lo.
A duh duh zawnga four leh six hlap thei, hmana Sachin Tendulkar kha a ni tawh lo a, engtiklai pawha lehlam pawl player 4-5 vel bum kual reng thei Messi a ni tawh hek lo. Mahse an tleirawl tha zat lai ni loin, tawnhriat leh team-a pa chan an channa chu khuanuin an ropuina tifamkimtu dawhsan atan a lo ruat lawk kiauin, an hun hnuhnunga, a ropui ber mai World Cup nomawia an kut an han nghat ve thei kha, Hollywood script-a Oscar Award dawng tlâk hial khawpa thawnthu ngaihnawm a ni ta hial awm e.
Mi bik, mi danglam 'Aw ropui ber Lionel Messi leh Sachin Tendulkar' tiin chibai kan buk nawn leh e. A nung chunga, kan damlaia an vanglai hmu theia kan han awm thei ve hi keini infiamna khawvel tan chuan a va han hlu tak em.
- K. Vanlalruata