Tuna kan awmna hi kan phu - Arteta

Premier League hmahruaitu Arsenal manager Mikel Arteta chuan tuna an awmna chu an phu tih a sawi a, season chawhnu lamah inelna hautak dawn mah se theihtawp an chhuah chhunzawm tur thu a sawi bawk.

World Cup vangin European league an chawl a, tunah chuan EPL an khel chhunzawm leh dawn hnai. December 26 zanlaiah Gunners pawh hian West Ham an mikhual dawn, inelna a hautak nghal dawn tih a chiang.

Arteta chuan, "Kan player-te hi ram hran hrana mi an ni a, chuvangin inkhel chi hrang hrang kan en hnem, keimah chauh ni loin coach dang pawh an ni vek ang, hei hian football thlirna hran min siamsak a, a hlawk zawngin kan hman theih ka beisei.

"World Cup khel ve lote pawhin Dubai lamah ngawrh takin training kan nei reng, kan thawkrim em em a, keini hi chu chhungkua ang maia khawsa kan nih avangin kan thil tihte kha a nuam vek," tiin team boruak a ṭhat thu a sawi.

Brazil tana a feh chhuahna lamah Gabriel Jesus a hliam a, ani hi nipui laia an lakluh chauh kha ni mah se rinrawl a ni a, tlarhma laia an mi pawimawh a nih avangin a tel lohna Arsenal hi an buai mai ang em, tih chu zawhna lian tak a tling.

Arteta chuan, "Ani hi kan tana player pawimawh a ni a, thil eng emaw danglam tak min rawn kensak avangin a pawimawhna a sang, kan chhawr thei lo tur hi pawi ka ti. Mahse, player dang kan la nei tho, a hmun ruak hnawh khah kan tum dawn.

"Eddie Nketiah hi Jesus khelhna hmuna khel thei leh theihna nei sang ve tho a ni a, hei bakah hian thlasik bazar a inhawng dawn bawk, duhthlan tur chu kan neih theih ka beisei," tiin a sawi.

Premier League hmahruaitu nih chungchang sawi zuiin Arteta chuan, "Football chu hun rei lote chhungin a danglam vek thei, team ṭha tak hi a karlehah chuan kan zuai nghal daih thei tih hi a takin kan hria, chuvangin match khat zel kan ngaihtuah tur a ni ang.

"Arsenal ka enkawl chinah tun season hi pre season aṭanga ka bul ṭan thlap vawi khatna a ni a, ka player neihte nen pawh kan inhrechiang ṭha, thawhhona ṭha tak nena tun dinhmun hi thleng kan ni, a tawp erawh kan la hlat hle," a ti.