Premier League ; Krismas laia hmahruaitu hi an champion zui em?

Arsenal-in kum 2004 hnua a vawi khat nan Premier League nomawi chawi an tum a, kum 2022 Krismas laia league hmahruaitu an ni. Gunners hian point 37 an hmu a, khelh zat inangah champion Manchester City aiin point ngain an hmu tam zawk.

Mikel Arteta hote hian champion ngei an tum a, an champion ang em, tih erawh hunin a hril ang. Tun ṭumah hian Premier League champion zingah Krismas laia hmahruaitu engzat nge awm tih kan chhui dawn a ni.

Premier League hi vawi 30 khelh a ni tawh a, Krismas laia hmahruaitu hi vawi 16 an champion. League-a vawi khat champion ve tawh Blackburn Rovers, Leicester City leh Liverpool te kha Krismas laia hmahruaitu vek an ni.

Chutihrualin league-a vawi nga champion Chelsea pawh nomawi an chawi ṭum hian Krismas laiin hma an hruai vek. Arsenal erawh vawi thum an champion-ah vawi khatmah Krismas laiin hmahruaitu an ni lo.

An elpui Man City hi vawi ruk an champion tawh a, vawi thum an champion-ah Krismas laia hmahruaitu an ni a, vawi thum dangah hmahruaitu an ni lo.

A pawimawh ta ber chu Krismas laia hmahruaitu nih lam a ni chiah lo a, engzatin nge hma an hruai tih leh engvangin nge hma an hruai tih hi a ni.

Tun season Arsenal hi chu an khelh ṭhat vanga hmahruaitu an ni a, match 14-a point 37 hmuh hi a ṭha thlawt. Chutihrualin kuminah erawh World Cup vangin season chanve pawh an la khel tling lo a, match 22 chauh khelh tur a la awm avangin Premier League nomawi inchuhna hi a la nung ṭha hle.