Ranji Trophy A vawi hnih nan Mizoram an chak

India ram chhunga state leh state cricket inelna sang ber Ranji Trophy-ah Mizoram chuan a vawi hnih nan chak ni hmel an hmu ve leh ta. Nilaini khan Mizoram hian Arunachal Predesh chu innings khat leh run 118-in an hneh.

Ṭhum vawra vannei zawk Mizoram lamin vawm hmasak an thlang. Ramhlun Venglai tlangval Remruatdika Ralte chuan over 13-ah wicket li (4) lain, captain Taruwar Kohli-a'n wicket li a la ve bawk, run 63 lekah Arunachal Pradesh an vawm out vek a ni.

Mizoram lamin vaw ve lehin Taruwar Kohli chuan Meghalaya an tum ṭuma a chet ṭhat chhunzawmin, double century (run 203) lai a siam. Shreevats Goswami-a'n run 50 a belh ve bawk avangin Mizoram hian run 338 an siam.

2nd innings an ṭan leh a, innings hmasaa Mizoram an bat ṭhat avangin run 275 laiin hma an hruai sa. Arunachal Pradesh lamin theihtawp chhuah ve leh hnuhnawh mah se bowler Remruatdika Ralte bawk an ngam lo.

Tawnhriat ngah, ball vawm vir thiam bik Avinash Yadhav-a'n wicket li rawn lain first class cricket-a mi 100 a vawm out-na chiah a ni a, 2nd innings-ah Arunachal Pradesh-in run 157 bak an siam lo. Hei vang hian Mizoram hian vuak nawn leh ngai loin innings leh run 118 laiin Arunachal Pradesh an sawp.

Cricket Assocaiton of Mizoram (CAM) team hian kum 2021 January 21 khan Sikkim an lo hneh tawh bawk a, mipa senior team cricket hmanga inelna sangah hian tunah a vawi hnih nan hnehna an chang ve leh ta chiah a ni.

Mizoram hi plate group-ah Arunachal Predesh, Bihar, Manipur, Meghalaya leh Sikkim te nen an awm ho a, an inkhelh kual vek hnuah a sang pahnihin knockout round an lut ang.

Plate Group

Mizoram bt Arunachal Predesh
A hmun: Lal Bahadur Shastri Stadium, Gujarat
Toss: Mizoram lamin vawm hmasak an thlang

1st Innings:
Arunachal Pradesh 63/10 (30.4 overs)
Kumar Nyompu 24 (52); Kamsha Yangfo 17 (30)
Taruwar Kohli 2/4 (8); Remruatdika Ralte 21/4 (13)

Mizoram 338/10 (90 overs)
Taruwar Kohli 203 (297); Shreevats Goswami 50 (61)
Nabam Abo 75/4 (24); Niia 114/3 (23)
(Arunachal Pradesh hi run 275 in an hniam)

2nd Innings:
Arunachal Pradesh 157/10 (48.4 overs)
Kumar Nyompu 64* (128); Suraj Tayam 29 (77)
Avinash Yadhav 42/4 (11.4); Remruatdika Ralte 30/3 (13)
(Mizoram hi run 118-in an chak)
MoM: Taruwar Kohli, Mizoram