PSG-ah Messi a cham dawn

Lionel Messi chuan Paris Saint-Germain tan contract thar a ziak dawn niin khawthlang media rintlakte chuan an tarlang a, he thu buatsaih a nih lai hian player leh club lam aṭangin a nemnghehna thu erawh puan chhuah a la ni lo thung.

Messi hian 2021 khan Barcelona tana a contract a hmang zo a, pawtsei tura ngaih a nih laiin Catalan club nen hian mittui nen an inṭhen. Paris club tan season hnih contract a ziah chu tun season tawp rualin a zo dawn.

An inremnaah hian, contract a zawh hunah an duh a nih a, an inrem bawk chuan pawhsei theih tur a ni ang, tih an ziak tel. Club leh player hian hun rei zawk atan inrem hi an duh niin a lang.

Tun thlatir khan Paris St Germain president Nasser Al-Khelaifi chuan PSG-ah Messi hi a hlim tih a lo sawi tawh a, hei bakah hian contract thar ziak tura an inbuatsaihthu a sawi tel bawk, hei vang hian Paris club lam chuan chelh ngei an duh.

Messi hi kum 35 mi a ni tawh a, a vanglai a pel ve tawh. Mahse, season kal laiah PSG tan goal 12 khungin a ṭhiante khung tur vawi 14 a siamsak tawh bawk, a thil tih hi player vantlang chunglam tan chauha tih theih a la ni.

World Cup khelh zawh takah Argentina a champion pui a, goal ruk a khung bakah assist vawi thum neiin player ṭha ber atan an thlang. Tuna a khelh dan thlir chuan PSG tan Messi chelh chhunzawm theih hi chanchin lawmawm a ni ang.