Man United tan Rashford a vul

FIFA World Cup khelh zawhah Manchester United forward Marcus Rashford-a'n insiamrem turin hun a mamawh rei lo a, Nilaini zan khan Old Trafford-ah goal ropui bik a khung. League Cup last 16-ah Erik Ten Hag-a hote hian Burnley 2-0 in an hneh a, Rashford-a'n solo goal a khung hma hian Christian Eriksen-a'n a khung ve bawk.

League Cup inkhel dangah Nottingham Forest-in Blackburn Rovers 4-1 in an sawp. Brighton & Hove Albion erawh Charlton Athletic lakah goal an khung thei lo a, penalty shootout-ah Charlton 4-3 in an vannnei. League One club Charlton hi quarterfinal lut zinga Premier League club ni lo awmchhun an ni.

United an mawi

Manchester United-in World Cup chawlh laiin Spain-ah training an nei a, friendly match-ah Cadiz (2-4) leh Real Betis (0-1) te an hneh lo. League Cup last 16-ah erawh Ten Hag-a hote an hmuhnawm a, Championship hmahruaitu Burnley lakah an chungnung hle.

Kum 18 mi Alejandro Garnacho chuan hun ṭha neih hmasak a hloh a, keeper chauh a hmachhawn hnuah a khung lo. Minute 27-naah United-in Christian Eriksen hmangin hma an hruai a, goal khungtu ai mahin a siamtu Aaron Wan-Bissaka hnathawh a ropui zawk.

Goalkeeper-ah David de Gea hahdamtir a ni a, Martin Dúbravka a lut thung. Dubravka hian save ṭha nei bawk mah se a tihsual vangin goal an chhuah teuh hle. Mualneitu hi goal khat chiah an neih avangin an dinhmun a him bik lo.

Minute 57-naah Rashford chuan yard 60 chuang a khalh hnuah box chhung aṭangin goal kilah kawh zetin a pet lut a, United-in nuamsa zawkin hnehna an chan theih phah. Ten Hag-a hote 2-0 in an chak a, nomawi beiseina an nei chhunzawm zel.

United dinhmun

Man United-in damlohna avangin Harry Maguire an chhawr thei lo a, tlarhnungah Victor Lindelof leh Casemiro te an inkawp a ngaih phah. Ten Hag-a hote hian December 27, Thawhlehni zan dar 1:30-ah Nottingham Forest an hmachhawn dawn a, Premier League club hmachhawn tur chuan centre back pangngai an dam hman a pawimawh ang.

Tlarhmaah Anthony Martial a awm a, French forward hian a theihna a pholang. Chutihrualin United-in January transfer-ah no. 9 striker erawh an la mamawh reng. Inkhelh hmaa tarlan angin Jadon Sancho a la inlan thei lo a; chutihrualin World Cup khel player-te an kir tawh avangin Premier League hmachhawn turin United an inpeih.

League Cup - Last 16

December 21, Nilaini
Charlton 0 - 0 Brighton
Penalty Shootout-ah Charlton 4-3 in an chak
Blackburn Rovers 1 - 4 Nottingham Forest
BLA : Scott Wharton 44'
NOT : Brennan Johnson 13' (P), 90+2'; Jesse Lingard 53'; Taiwo Awoniyi 79'
Manchester United 2 - 0 Burnley
MNU : Christian Eriksen 27'; Marcus Rashford 57'

Note:
• Wolves, Southampton, Newcastle United, Leicester City, Nottingham Forest, Manchester United leh Charlton ten quarerfinal an lut.
• Nizan khan Man City leh Liverpool te an inkhel a, result kan hre hman lo.
• Quarterfinal lut zingah Charlton Athletic chiah Premier League club ni lo an awm a, Charlton hi League One club an ni.