BBC Sports Personality of the Year Beth Mead

British media rintlak BBC chuan Sports Personality of the Year 2022 atan England leh Arsenal hmeichhe team forward Beth Mead an thlang a, kum 27 mi Beth Mead hi hmeichhe footballer zinga he chawimawina dawng thei hmasa ber a ni.

Mead hian 2020 Tokyo Olympics-ah khan Great Britain squad-ah hmun a chang phak lo. Mahse, season hmasa khan Arsenal tan match 40-ah goal 14 leh assist 10 neiin a hming a chher a, Euro 2022-ah England a champion pui bawk.

Ballon d'Or (hmeichhia), 2021-22 ah pahnihna a ni a, Euro-a England an champion theih nan player thawhhlawk bera chhal ngam a ni - match ruk an khelh aṭangin match liah goal a khung a, Norway lakah hattrick hial siamin, Euro 2022 top scorer a ni - goal ruk a khung.

Mead hian tun season-ah erawh hliam vangin match a khel tam lo a, nakkum hmeichhe World Cup-a a inlan theih dawn leh dawn loh a la chiang lo - qualifier-ah tlawm nei miah loin England hi a tlinpui a ni.

England tan match 50-a goal 29 khungtu Mead chuan, "He award ka dawng thei hi ka lawm hle. Ka ṭhiante puihna lo chuan ka dawng lo ang tih ka chiang - an zar liau liau a ni. He award hi hmeichhe infiamna atan a ni a, kawng dik kan zawh mek a ni. Hawh u, hmalam i pan zel ang u," tiin hmeichhe infiammite a sawm.

BBC Sports Personality of the Year thlannaah hian England cricket Test captain Ben Stokes chu pahnihna a ni a, Winter Olympics curling champion Eve Muirhead chu pathumna a ni thung.

Vawi sarih ngawt snooker world champion ni thei Ronnie O'Sullivan, gymnast floor world champion Jessica Gadirova leh 1,500m athletics world champion Jake Wightman te chu nominee zingah an tel bawk a, anni ho hi panel-in an thlante niin, mipuiin vote hmangin award dawng tur an thlang leh a ni.