Bengaluru an tho hlen thei dawn em?

Tun season-a beisei phak lo Bengaluru FC chuan zanin dar 7:30 hian Indian Super League-ah champion lai Hyderabad FC an mikhual dawn a, Indian football fan-te zawhna chu, "An tho hlen thei ang em?" tih chu a ni.

Bengaluru hian tun season-ah league match 10 khelin point 10 chiah an la nei - league match hnih a zawna an tlawm hnuin an league match hnuhnung berah Jamshedpur chu 1-0 in an hneh a, mahse, Men of Steel hi anmahni ang thoa season hmang ṭha lo an nih avangin mipuiin Bengaluru chunga rinna nghah chhunzawm an harsat.

Bangalore club hi table-ah pariatna an ni mek a, season tawpa semifinal khel tur chuan an tan thilmak a thlen a ngai tawh hial ang - hei vang hian zaninah chak an mamawh a, mahse, an tum tur erawh Hyderabad an ni.

Champion lai Hyderabad hi tun season-ah pawh semifinal khel turin an dinhmun a ṭha hle - league match 10-ah vawi hnih chiah an la tlawm a, point 22 nei tawhin hmahruaitu Mumbai City chu point hnih chiahin an phak lo.

November thlaa an match tawp berah ATK Mohun Bagan (1-0) ngam lo mah se Chennaiyin (3-1) leh East Bengal (2-0) hnehin an insiamṭha leh tawh a, Bengaluru nen tun season-a an intawn hmasakah 1-0 in an chak tawh bawk - Sunil Chhetri khelhna Bengaluru tan a awlsam dawn lo tih a chiang.

ISL hi Krismas ni tak, December 25 tih lohah chuan match a awm chhunzawm dawn a, December 31 leh January 1 chawlh hnuah, January 2-ah khelh chhunzawm lehnghal a ni dawn bawk a ni.

Nizan khan Jamshedpur FC leh FC Goa inkhelin, he thu buatsaih a nih lai hian result kan hre hman lo.