Santosh Trophy-a Mizoram elpui tur Kerala

Mizoram football team chuan nimin khan Santosh Trophy khel turin Aizawl an chhuahsan a, inelna neihna hmun tur Khozikode, Kerala an pan.

Group II bik hian December 26, Thawhṭanni aṭangin inelna an ṭan ang a, Mizoramin December 27, Thawhlehni hian match hmasa berah Andhra Pradesh an hmachhawn dawn. Mizoram elpui tur ber erawh inelna thlengtu Kerala an ni ang.

Mizoram hi group II-ah Kerala, Rajasthan, Bihar, Andhra Pradesh leh Jammu & Kashmir te nen an awm a, vawi khat inkhelh kuala tiṭha berin final round an lut dawn.

Team 36 chu group parukah ṭhen hran an ni a, pahnihna zinga tiṭha paliin final round an khel bawk dawn.

Mizoram assistant coach Lalrindika Hmar chuan, "MPL semifinal khel chin aṭangin Santosh Trophy-a khel tur koh tam tak an awm a, MPL khelh tur a la awm avangin training tir lamah buaina kan nei. Tin, koh chhin zingah inhliam vanga kan duh deuhte kal thei lo an awm nual. Training-na hun kan nei tam lo a, kan neih chhunah erawh theihtawp kan chhuah. Result ṭha tak kan neih theih nan mipuite ṭawngṭaipuina kan dil a ni," tiin Vanglaini a hrilh.

Rindika Hmar hian MPL9-ah khan FC Venghnuai enkawlin final a thlenpui a, tun ṭum Mizoram team-ah hian assistant coach hna a chelh ang. Mizoram coach hi Shillong Lajong captain hlui Samson Ramengmawia a ni dawn a, K. Lalenghluna (Maenga) chu manager a ni.

Group hmahruaitu chiah an tling nghal dawn a, hemi a nih avang hian chak vek a pawimawh dawn. Chutih rualin chetsual theih a nih avangin goal khung tam a pawimawh dawn a; Malsawmfela, Lalrinzuala leh Joseph Lalvenhima ten an theihna an pholan a pawimawh ang.

Mizoram hian group match hnuhnung berah Kerala an hmachhawn dawn a, mualneitu an hmachhawn hmaa goal difference an neih ṭhat zawk chuan draw ringawt pawhin final round a luh theih dawn tihna a ni. Chutihrualin vanduai palh a awm thei a, pahnihna zinga tiṭha pali zing tala tel turin a tir aṭanga ṭan mar a ṭul ang.

Fixtures - Group II (Mizoram awmna)
Round 1
December 26, Thawhṭanni
Bihar Vs Jammu & Kashmir
Rajasthan Vs Kerala
December 27, Thawhlehni
Andhra Pradesh Vs Mizoram
Round 2
December 29, Ningani
Bihar Vs Kerala
Jammu & Kashmir Vs Mizoram
December 30, Zirtawpni
Rajasthan Vs Andra Pradesh
Round 3
January 1, Pathianni
Bihar Vs Mizoram
Kerala Vs Andhra Pradesh
January 2, Thawhṭanni
Jammu & Kashmir Vs Rajasthan
Round 4
January 4, Nilaini
Bihar Vs Andhra Pradesh
Mizoram Vs Rajasthan
January 5, Ningani
Kerala Vs Jammu & Kashmir
Round 5
January 7, Inrinni
Bihar Vs Rajasthan
Andhra Pradesh Vs Jammu & Kashmir
January 8, Pathianni
Mizoram Vs Kerala