Krismas Chibai - Tuten nge pakhatna dinhmun luah?

Krismas ni kan thleng leh ta. Europe ram hrang hrang club dinhmun bihchianna hun hmang ila. Premier League bik chu ruai ṭheh ni aṭangin an khel ṭan dawn a, Krismas nia hmahruaitu chu Arsenal an ni.

La Liga lamah chuan Barcelona-in hma an hruai mek a, Serie A lamah Napoli a chung berah an awm. Bundesliga leh Ligue 1-ah Bayern Munich leh PSG te bawk hmahruaitu an ni a, German leh French champion tur hi chhiarkawp danin la chiang lo mah se nomawi chawi tur rinlawk a harsa tawh lo.

Arsenal hi

Arsenal-in kum 2004 hnua a vawi khat nan Premier League nomawi chawi an tum a, kum 2022 Krismas laia league hmahruaitu an ni. Gunners hian point 37 an hmu a, khelh zat inangah champion Manchester City aiin point ngain an hmu tam zawk.

Mikel Arteta hote hian champion ngei an tum a, an champion ang em, tih erawh hunin a hril ang. Premier League hi vawi 30 khelh a ni tawh a, Krismas laia hmahruaitu hi vawi 16 an champion. League-a vawi khat champion ve tawh Blackburn Rovers, Leicester City leh Liverpool te kha Krismas laia hmahruaitu vek an ni.

Chelsea pawh nomawi vawi nga an chawi ṭumah Krismas laiin hma an hruai vek. Arsenal erawh vawi thum an champion-ah vawi khatmah Krismas laiin hmahruaitu an ni lo.

Chutihrualin Gunners hi tun season khelh ṭhat vanga hmahruaitu an ni a, an dinhmun ngaia insawhnghet turin khelh ṭhat chhunzawm an tum dawn a ni.

El Clasico
October 16 khan El Clasico-ah Real Madrid-in Barcelona 3-1 in an sawp a, Krismas laia La Liga hmahruaitu erawh Catalan club an ni thung.

Barca hian match 14-ah point 37 an hmu a, pakhatna dinhmun luah mek mah se Real aia an point hmuh tamna hi point hnih chauh a ni.

March thla laihawlah El Clasico a awm leh dawn a, La Liga nomawi inchuh a la ngaihnawm dawn chauh. Barca emaw Real emaw hi champion tura ngaih an ni a, Spanish club lian pahnih hi tun season-ah club dangin an elpha lo deuh.

Napoli hun
Napoli hi an club history-ah ṭum hnih chiah Serie A-ah an la champion a, nomawi an chawi ṭum chu 1987 leh 1990 daih tawh kha niin Diego Maradona hoin an champion.

Tun season-ah Napoli hian hneh loh an la tawng lo a, match 15 aṭangin point 41 an hmu a, AC Milan aiin point riatin an hmu sang zawk.

Napoli hi Champions League-ah pawh an khel ṭha a, knockout stage-ah Eintracht Frankfurt an hmachhawn dawn avangin quarterfinal luh a beiseiawm hle.

Messi vs Mbappe
Ligue 1 bikah chuan PSG elpha tur an awmin a lang lo a; Lionel Messi, Kylian Mbappe leh Neymar te awmna team hi team dang tan an ṭha mah mah.

Hei vang hian Ligue 1-a hriat châkawm ta ber chu Mbappe nge Messi-a'n season khar ṭha zawk ang tih hi a ni.

Tun dinhmunah Mbappe hian Ligue 1-ah goal 12 a khung tawh a, assist erawh vawi hnih chiah a nei. Messi erawhin goal sarih chauh khung mah se assist vawi 11 a nei a, Argentina captain hi Mbappe aiin goal-ah inrawlh tam zawk.

Chutihrualin Mbappe-a'n training a zawm leh tawh a, December 28, Nilaini zana Strasbourg nen an inkhelh hunah pawh a inlan ngei a rinawm. Messi erawh a inlan a la rinawm lo a, Mbappe tan record siam ṭhatna remchang a ni ang.