Highlander an chak ve ta

NorthEast United chuan tun season-a a vawi khat nan Indian Super League-ah hnehna an chang ve ta a, Inrinni zan khan an mikhual ATK Mohun Bagan chu 1-0 in an hneh - tun season-a point an hlawhchhuah hmasak ber a ni.

Indira Gandhi Athletic Stadium, Guwahati-a inkhelah Highalnder tan striker Wilmar Jordan chuan inkhela goal awmchhun a khung a, minute 69-naa a goal khung hi Bagan lamin an sut thei lo.

NorthEast United FC head coach Vincenzo Annese chuan, "Hnehna chang ṭhin ka ni a, ka player-te pawh chutiang chu ni se, ka duh a ni," a ti a, a pawr nghal hle - "Zawi zawiin hma kan sawn zel ang," a ti bawk.

Highlander hi league match 10 zet a zawnin an tlawm tawh a, Guwahati club-in coach Marco Balbul an ban hnuah Highlander enkawl hna hi thawk ṭanin, match thum a enkawlnaah hnehna a chanpui a ni.

Inrinni zan inkhelah hian Highlander tan Joe Zoherliana leh Rochharzela ten inkhel bul an ṭan a, R. Laldanmawia chu bench aṭanga luhtir a ni bawk.

Zaninah ISL inkhela awm lo ang.