Kerala-in an theihna an pholang

India rama football hmanga state leh state inelna sang ber 76th Hero Senior Men’s National Football Championship chu khelh ṭan a ni ta a, nimin khan Mizoram awmna group II ten Khozikode, Kerala-ah an khel ṭan.

Inelna thlengtu Kerala chuan Rajasthan chu 7-0 in an sawp a, bul an ṭan ṭha hle. Inkhel dangah Jammu & Kashmir chuan Bihar 2-0 in an hneh ve bawk.

Kerala hian first half-ah 5-0 in hma an hruai a, minute rukna lekah Nijo Gilbert-a'n goal hmahruai khungin M. Viknesh (12', 20') leh B. Naresh (23', 36') ten an khung belh. Second half-ah pawh Kerala bawk an chungnung a, amaherawhchu Riswan Ali-a'n goal hnih khungin goal dang an khung belh tawh lo.

Santosh Trophy-ah hian group paruk aṭangin hmahruaitu ṭheuh bakah a ti ṭha paliin final round an lut dawn. Services leh Railways an vannei a, team pahnih hian final round an lut sa.

Kerala hi champion lai an nih bakah inelna thlengtu an nih avangin rinkai ber an ni a, Mizoram tan final round thlen a awlsam dawn lo.

Vawiin tlai dar 3:30 hian Mizoramin Andhra Pradesh an hmachhawn dawn a, Samson Ramengmawia hote tan chak ringawt a tawk lo - chiang taka chak a pawimawh ang.

Mizoram hian December 24 zanlai khan inelna neihna hmun Khozikode hi an thleng. Hahdamna hun ṭha an nei leh tawh avangin Andhra Pradesh lakah ṭha taka an khelh theih a rinawm. Krismas vuakveta Mizoram tana feh chhuak player leh coaching staff-te hi an fakawm hle.