Ruaiṭheh niah Liverpool an chak

World Cup zawh hnua Premier League match an khelh leh hmasak berah Liverpool chuan hnehna an chang nghal a, an mikhualna ramah Aston Villa chu 3-1 in an hneh.

Reds tan Mohamed Salah, Virgil van Dijk leh Stefan Bajcetic ten goal khat ṭheuh an khung a, Villa tana Ollie Watkins goal khungin awmzia a nei phak lo.

Liverpool tan full back pahnih Trent Alexander-Arnold leh Andrew Robertson ten mawi taka ball an inpek kual hnuah Salah chuan a hmawr a bawk a, goal a khung hian minute ngana chauh a la ni.

Egyptian forward hian Reds tan khualmualah league goal 55 zet a khung ta a, Liverpool tana khualmuala Premier League goal khung hnem ber Michael Owen a nih rual - Robertson tan pawh goal hmasa ber hi hriatreng tlak a tling.

Scottish defender hian Salah goal khung tur a siamsak chiah khan Premier League-a defender assist ngah ber dinhmun a luah nghal a, Everton left back hlui Leighton Baines (53 assists) khumin vawi 54 assist a nei tawh a ni.

Merseyside club tan Van Dijk chuan minute 37-naah an goal hnihna a khung a, Watkins chuan si phurh rawn sut ṭhen mah se Stefan Bajcetic chuan Liverpool tana a goal hmasa ber khungin Reds a chakpui - kum 18 mi defender tan zan chhinchhiah tlak a ni.

Liverpool tan Darwin Nunez-a ke hmui zan ni se, goal tam zawk khung thei an ni - Nunez hian uiawm tak taka chance hlah a nei nual a, chutihrual chuan a thawkrimin goal khung châkin a tuihal a, tlarhnung a pui ṭha bawk.

Reds-in hnehna an chan avangin table-ah parukna an ni a, match 15 an khelh aṭangin point 25 an hmu - palina Tottenham Hotspur chu match khata khel tlem chungin point ngain an phak lo mek.

December 26, Thawhṭanni Zan

Brentford 2 - 2 Tottenham

BRE: Vitaly Janelt 15'; Ivan Toney 54'

TOT: Harry Kane 65'; Pierre-Emile Hojbjerg 72'

Leicester City 0 - 3 Newcastle United

NEW: Chris Wood 3' (P); Miguel Almiron 7'; Joelinton 32'

Everton 1 - 2 Wolves

EVE: Yerry Mina 7'

WOL: Daniel Podence 22'; Rayn Ait Nouri 90+5'

Crystal Palace 0 - 3 Fulham

FUL: Bobby Reid 31'; Tim Ream 71'; Alexander Mitrovic 80'

Southampton 1 - 3 Brighton

SOU: James Ward-Prowse 73'

BRI: Adam Lallana 14'; Romain Perraud 35' (OG); Solly March 56'

Aston Villa 1 - 3 Liverpool

LIV: Mohamed Salah 5'; Virgil van Dijk 37'; Stefan Bajcetic 81'

AST: Ollie Watkins 59'

Arsenal 3 - 1 West Ham
ARS: Bukayo Saka 53'; Gabriel Martinelli 58'; Eddie Nketiah 69'
WES: Said Benrahma 27' (P)

Zanin Inkhel Tur

Chelsea 11:00 PM AFC Bournemouth
Manchester United 1:30 AM Nottingham Forest