Liverpool player thar tur Gakpo

Manchester United nena sawizawm hlawh tak Netherlands forward Cody Gakpo chuan Liverpool a zawm dawn a, Merseyside club lamin thuchiang la puang lo mah se Gakpo khelhna PSV Eindhoven chuan Reds nen inremna an neih tawh thu an sawi a ni.

Gakpo hian vawiinah medical a nei tura ngaih a ni a, beisei anga thil a kal tluan chuan June 2028 thleng Anfield-a cham turin contract a ziak ang - Gakpo hian Liverpool-in an duh tih a hriatin Virgil van Dijk a be nghal nia sawi a ni a, Liverpool player a ni dawn ta.

PSV chuan Gakpo an hralhna man zat chu an club chanchina transfer man to ber a nih thu an tarlang a, official taka tarlan la awm lo mah se Liverpool hian pound maktaduai 37 an pe phawt ang a, a khelh ṭhat dan a zirin pound maktaduai 13 dang an pe leh ang.

Kum 23 mi Gakpo hian World Cup khelh zawh takah khan, group stage match-a Senegal, Ecuador leh Qatar an hmachhawn ṭumin goal a khung vek a, PSV tan season kal mekah league match 14 khelin goal kua a khung tawh a, assist vawi 12 ngawt a nei bawk.