Mizoramin chakin bul an ṭan

Santosh Trophy vawi 76-naah Mizoram chuan an match hmasa berah Andhra Pradesh chu 3-0 in an hneh. Samson Ramengmawia kaihhruai Mizoram hian December 29, Ningani zing dar 8:00-ah Jammu & Kashmir an hmachhawn leh ang.

EMS Corporation Stadium-ah Mizoram tan Malsawmfela'n goal hmahruai a khung a, hun tawp dawn hnaihah substitute Joseph Lalvenhima'n goal hnih a khung belh.

Bul ṭantute

Mizoram team-ah hian tawnhriat nei player an tam lo a, tun hmaa Mizoram tana rilrawl ni pha pali goalkeeper F. Lalmuanawma (MPL9 best keeper), defender Lalrinchhana Tochhawng (MPL9 best player), midfielder H. Lalbiakthanga leh striker Sawmfela ten bul an ṭan vek.

Rinchhana hi MPL9 best defender Lalruatfela (FC Venghnuai) nen an inkawp a, FC Venghnuai defender Lalrempuia leh Chhinga Veng FC defender Lalbiakhlua te mual sirah an awm.

Midfield-ah BT-a thlawp turin MPL9 best midfielder H. Vanlalhriatzuala (Chawnpui FC) leh Chhinga Veng FC midfielder Lalthankhuma (TK-a) te an awm.

Forward-ah Sawmfela chu a laiah a ding a, ding leh vei aṭangin Chhinga Veng FC forward Lalrokima leh FC Bethlehem forward Lalbiakdika ten an thlawp bawk.

Goal thum chu

Rinlawk ang ngeiin Mizoramin inkhel an thunun a, Sawmfela'n ṭan phatah chance ṭha bik a hlah. Mizoram Police forward Sawmfela hian goal ruakah a khung lo.

Minute 22-naah Hriata fing takin BD-a a pe a, dinglam aṭanga Champhai Zotlang tlangval BD-a cross chu Sawmfela'n a awmin (chest) goal ruakah a khung.

Mizoramin inkhel an thunun chungin goal dang an khung belh lawk lo. Minute 82-naah Mizoramin Andhra Pradesh offside trap an bum ta a, Hriata'n mahni hma sial lo takin NE Olympic 2022 top scorer Joseph tan a pe a, Lunglei Bazar Veng tlangvalin chiang takin a pet goal.

Minute 90-naah Joseph-a'n a khung belh leh a, 3-0 in Mizoram an chak. Amaherawhchu inelna thlengtu Kerala-in Rajasthan 7-0 in an sawp a, Santosh Trophy champion lai hi group hmahruaitu an ni. Inkhel dangah Jammu & Kashmir chuan Bihar 2-0 in an hneh ve bawk.

December 29, Ningani

8:00 AM Jammu & Kashmir Vs Mizoram

3:30 PM Bihar Vs Kerala

December 30, Zirtawpni

3:30 PM Rajasthan Vs Andhra Pradesh