Mizoram dinhmun hi eng ang chiaha tha nge?
Santosh Trophy vawi 76-na chu khelh chhoh mek a ni a, Mizoramin match hmasa pahnihah Andhra Pradesh leh Jammu & Kashmir hnehin point ruk hmuh theih aṭangin point ruk an hlawh chhuak. Coach Samson Ramengmawia hote an che chhe lo a, tun ṭumah hian final round khel tura an dinhmun kan sawifiah ang.
Inelna kalphung
State leh Union Territory team 36 chu group parukah ṭhendarh an ni a, khawpui hrang hrang parukah first round hi khelh a ni. Tie draw neih hnuah Dadra and Nagar Haveli and Daman and Diu te an inhnuhdawh avangin group IV bikah team paruk awm loin team panga an awm. First round hmachhawn zat pawh team 36 ni loin team 35 an ni ta zawk.
Group tin aṭanga pakhatnain final round an lut ang a, pahnihna zinga ti ṭha paliin final round an lut bawk ang.
Pakhatna
Final round luh chian nghal dan chu pakhatna nih a ni. Mizoram hi champion lai leh inelna thlengtu Kerala nen an awm kawp avangin pakhatna nih hi a awlsam dawn lo. Team ṭha pahnih hian match hmasa pahnihah hnehna an la chang ve ve.
Mizoram leh Kerala te hian point ruk ve ve hmu mah se champion lai Kerala hian goal khat chauh an chhuah bakah goal 11 ngawt an khung avangin an goal difference chu 10 a ni. Mizoram erawh goal ruk khung mah se goal hnih an chhuah avangin an goal difference chu pali a ni a, Kerala aiin paruk ngawtin a tlem zawk.
Mizoram tan goal difference-a Kerala khum hi a harsa tawh dawn a, team pahnih hian an intawn hma match hnihah hnehna an chang ve ve a nih chuan Samson Ramengmawia hote tan pakhatna dinhmun luah turin match tawp berah Kerala hi an hneh a ṭul dawn.
A eng zawnga thlir erawh chuan Kerala hian team ṭha pathumna J&K an la hmachhawn dawn a, point hloh ve thei an la ni. Kerala hian point an hloh a nih erawh chuan Mizoram tan match tawp bera draw a tawk ang. Tun dinhmuna a lan dan chuan pakhatna dinhmun hauh turin Mizoram aiin Kerala dinhmun a ṭha zawk.
Pahnihna hi
Mizoram hian pakhatna dinhmun an luah pha ta lo a nih pawhin pahnihna zinga ti tha pali zinga an tel phak chuan final round an khel tho dawn. Hetah bik hi chuan group dang result thlir tel a ngai tawh ang.
Group I-ah Karnataka (12) in hma an hruai mek a, Delhi (10) in pahnihna dinhmun an hauh. Team pahnih hi an la inhmachhawn dawn a, Karnataka hian hnehna an chang a nih chuan Delhi point 10-ah an tawp dawn. Mizoramin match tawp berah Kerala hneh lo pawh ni se match hnuhnung pahnih an chak chuan Delhi chungah an awm dawn tihna a ni.
Chutihrualin Delhi hian Karnataka hi an hneh thung erawh chuan Karanataka hi pahnihnaah an awm. Karnataka hian tun dinhmunah goal difference 17 an nei a, Mizoram tan Karnataka chunga awm turin Kerala laka point khat hmuh a ṭul ang.
Group III-ah Nagaland (6 pts) an la chak ve ve a, Goa-in (4) point an hloh tawh. He group-ah hian Arunachal Pradesh (3), Assam (3), Uttar Pradesh (1) leh Tamil Nadu (0) te an awm a, point an la hloh hlawm ngei a rinawm avangin he group-a pahnihna hi chu Mizoram hnuaia an awm ngei a rinawm hle.
Group V-ah Meghalaya-in hma an hruai mek. Meghalaya hian point 12 hmuh theh aṭangin point 10 an hmu tawh a, pahihna Odisha-in point kua an hmu thung. Chutihrualin Odisha leh Meghalaya te hi vawiin tlai dar 1:30 hian an inkhel dawn a, tu emaw zawkin point an hloh leh dawn. Mizoram tan chanchin lawmawm a awm theih ngei rinawm a, group IV pahnihna aiin Mizoram an hmuh ṭhat ngei a rinawm leh bawk.
Group IV leh Group VI te an la khel tan lo a, chutihrualin group pathum dang atanga thlir pawhin Mizoram hi pahnihna an nihn pawhin final round an thlen theih ngei a beiseiawm. Mahse, Mizoram tan pahnihna nih satliah a thiang lo - Bihar leh Rajasthan an hneh ngei a ṭul.
Hei chauh hi a la ni lo, India ram awp tum Mizoram tan pahnihna nichunga final round thlen tum tur a ni lo. Group-a pakhatna nichungin final round an thlen a ṭul a, chumi tur chuan Samson Ramengmawia hote hian champion lai Kerala hi an hneh ngei a ṭul bawk ang.
Fixtures & Results - Group II (Mizoram awmna)
Round 1
December 26, Thawhṭanni
Bihar 0 - 2 Jammu & Kashmir
J&K : Faisal Maqsood Thakur 38'; Aakif Javaid 58'
Rajasthan 0 - 7 Kerala
KER : Nijo Gilbert 6'; Viknesh M 12', 20'; Naresh Bhagyanathan 23', 36'; Riswanali Edakkavil 55', 81'
December 27, Thawhlehni
Andhra Pradesh 0 - 3 Mizoram
MIZ : Malsawmfela 26'; Joseph Lalvenhima 82', 90'
Round 2
December 29, Ningani
Jammu & Kashmir 2 - 3 Mizoram
J&K : Adnan Ayub 10'; Aakif Javaid 58' (P)
MIZ : Lalbiakhlua 33'; Lalthankhuma 83'; Lalnunzira Sailo 87'; Abdu Raheem 85'
Bihar 1 - 4 Kerala
BIH : Munna Mandi 70'
KER : Nijo Gilbert 24', 28'; Vishak Mohanan 81'
December 30, Zirtawpni
Rajasthan 1 - 0 Andhra Pradesh
RAJ : Youraj Singh 70'
Round 3
January 1, Pathianni
08:00 AM Bihar Vs Mizoram
03:30 PM Kerala Vs Andhra Pradesh
January 2, Thawhṭanni
03:30 PM Jammu & Kashmir Vs Rajasthan
Round 4
January 4, Nilaini
08:00 AM Bihar Vs Andhra Pradesh
03:30 PM Mizoram Vs Rajasthan
January 5, Ningani
03:30 PM Kerala Vs Jammu & Kashmir
Round 5
January 7, Inrinni
08:00 AM Bihar Vs Rajasthan
03:30 PM Andhra Pradesh Vs Jammu & Kashmir
January 8, Pathianni
03:30 PM Mizoram Vs Kerala