Mizoram tan goal surtir a ṭul
Santosh Trophy vawi 76 first round-ah Mizoramin match hmasa pathumah hnehna an chang vek a, amaherawhchu inelna thlengtu leh champion lai Kerala pawhin hnehna an la chan vek avangin Mizoram tan final round kawng a la bumboh hle.
Kerala hian Mizoram aiin goal an khung tam a, an dinhmun a ṭha zawk. Samson Ramengmawia hote hian vawiin tlai dar 3:30 hian EMS Corporation Stadium, Kozhikode-ah Rajasthan an hmachhawn dawn. Kerala-in Rajasthan hi 7-0 in an sawp thei a, chutihrualin Mizoramin 3-2 a an hneh hram Jammu & Kashmir nen an inhnehtawk tih hriat a ṭha.
Inelna thlengtu Kerala hian January 5, Ningani tlai dar 3:30 hian Jammu & Kashmir an hmachhawn ang. Group khat aṭangin pakhatna an tling chiang dawn a, Mizoram tan goal khung tam a pawimawh hle.
Mizoram tan
Santosh Trophy khelh hunlai hi Krismas vuakvet lai a nih avangin Mizoram squad-ah hming langsar awm lo an awm nual a, Mizoram hi an ṭhat dan berin an khel lo tiin a sawi theih. Player kal lote hi inhliam vang ni bawk mah se hun pui laia phaia zin an hreh vangah a ngaih theih.
Mizoram team hian inelna neihna hmun Kozhikode hi December 24 zanlaiah an thleng a, urlawk zan hun tam zawk chu 'bus'-ah an hmang. An hotel thlenna 'The Terrace Ladder' an thlen meuh chuan zan dar 2:00 chho a ni tawh.
Mizoram tana feh chhuak player-te inpekna a fakawm a, hunpuia laia nupui fanau leh chhungte kalsana zin chhuak an nihna lai hi a ropui lai chu a ni.
Vawi thumah vawi thum
Mizoramin December 27, Thawhlehniah Andhra Pradesh an hmachhawn a, 3-0 in an hneh. Mizoram Police striker ṭha Malsawmfela'n goal hmahruai a khung a, substitute Joseph Lalvenhima'n hun tawp dawn hnaihah goal hnih a khung. Andhra Pradesh lakah Mizoramin inkhel an thunun a, goal khung tam turin an goal bawh a na tawk lo thung.
December 29, Ningani zing dar 8:00-ah Mizoramin Jammu & Kashmir an hmachhawn a, J&K player lian ṭha tak tak hmaah Mizoram an talbuai hle. J&K-in an phu angin minute 10-na lekah Adnan Ayub hmangin an khung hmasa a, Mizoramin Lalbiakhlua hmangin minute 33-naah siphurh sutin inkhel an thunun zui bawk.
Amaherawhchu second half-ah J&K bawk an rawn khel ṭha zawk a, penalty aṭangin Aakif Javaid-a'n hmahruaina goal a khung nawn. Mizoram hi chak lo thei dinhmunah an ding a, a tawpah erawh an beidawn loh rah an seng. Lalthankhuma leh Lalnunzira Sailo te goal hmangin Mizoramin an lehthal a, 3-2 in an chak hram.
Mizoram fixture a fuh lo a, January 1 zing dar 8:00-ah Bihar nen an inhmachhawn. Kum thar zinga inkhel nichungin Mizoramin bul an ṭan ṭha a, minute hnihna lekah K. Vanlalhriatzuala'n mawi zetin a pet goal nghal. Mizoramin goal surtir dawnin lang mah se rin ang ngawt a ni lo.
Bihar-in Munna Mandi hmangin minute 33-naah siphurh an sut a, Mizoramin awlsam takin hnehna an chang lo. Champhai Zotlang tlangval Lalbiakdika'n second half-ah goal hnih a rawn khung a, Mizoram 3-1 in an chak.
Insiamṭhat ngai
Mizoramin goal an khung tam tawk lo a, an tlarhnung a phui lo bawk. Samson Ramengmawia hote tan insiamṭhat ran a ṭul a, vawiin tlaia Rajasthan an hmachhawn hunah ngei hian 'champion zia' an chhuah a ṭul hle. Amaherawhchu Mizoram hi hrem leh hliam vangin insiksawi a ṭul dawn.
MPL9 best defender Lalruatfela chu hrem vangin a khel thei dawn lo a, hemi a nih avang hian captain Lalrinchhana Tochhawng leh Abel Lalruatfela te an inkawp a ṭul ang. Chhinga Veng defender Abel-a hi a vawi khat inlan tur a ni. Tlarhma lamah J&K laka chakna goal khungtu Zira a inlan thei dawn lo a, Chanmari striker hi hliam vangin tun inelnaah a inlan thei dawn tawh lo.
Mizoram manager K. Lalenghluna chuan, "Team tin hi an ṭha vek. Kan group-a chak la nei miah lo Bihar pawh kha khelh an harsa a, state tin hian hma an sawn. Chuvangin Mizoram pawh tun aia kan ṭan lehzual a ṭul a ni. Eng match mah hi chak tur chiang sa tih theih a awm lo a, kan fimkhur a ṭul. Chutihrualin Rajasthan kan hneh chuan dinhmun ṭha takah kan ding ang," tiin Vanglaini a hrilh.
Santosh Trophy inelna kalphung - Tute nge tling dawn?
Santosh Trophy vawi 76 first round-ah hian team 36 an tel a, group parukah ṭhendarh an ni. Group tin aṭangin a sang ber ṭheuhin final round an khel ang a, pahnihna zinga ti ṭha pathum bakah Services leh Railways te an inlan bawk ang.
Kalphung chu
AIFF competition committee chairman Anilkumar Prabhakar chuan, "Final round-ah hian team 12 an awm dawn. Group tina pakhatna bakah pahnihna ti ṭha pathum an tel dawn. Services leh Railways te an tling sa a, tichuan team 11 an ni chiah ang. Team 12-na chu inelna thlengtu an ni dawn a, final round thleng tur erawh tih chian a la ni lo thung," tiin Vanglaini a hrilh.
Inelna thlengtu hi tihchian la ni lo mah se kumin inelna final round hi India ram khawpui Delhi-ah khelh a nih rinawm. Delhi hian first round an khel zo tawh a, an group-ah pakhatna an ni.
Anilkumar chuan, "Final round thlengtu tur hi an inpettling a nih chuan an awmna group-a pahnihna chu an tling nghal ang a, pathumna zinga ti ṭha pathum ni loin pali an an tling zawk ang," tiin a sawi.
Engtin zel?
Group IV leh Group VI ten an la khel ṭan lo. Group IV-ah hian Chhattisgarh, Dadra & Nagar Haveli and Daman & Diu, Haryana, Madhya Pradesh, Maharashtra leh West Bengal te an awm a, January 7 aṭangin Kohlapur, Maharashtra-ah an khel ṭan ang.
Group VI-ah hian Chandigarh, Himachal Pradesh, Jharkhand, Lakshadweep, Manipur leh Punjab te an awm. January 22 aṭangin Imphal, Manipur-ah an khel ṭan dawn. Group pahnihin an la khelh ṭan loh avangin Mizoram dinhmun hi chiang taka la sawi theih a ni lo.
Chutihrualin Delhi hi inelna thlengtu an nih chuan Mizoramin vawiin tlaia Rajasthan an hneh chuan final round an lut ang. A chhan chu group I-ah Delhi ni loin point 12 baka goal difference 16 ngawt neitu Karnataka chu an tling nghal ang a, pathumna dinhmun hauhtu Gujarat (9 pts) chuan pahnina dinhmun a luah dawn. Group V-a pahnihna Odisha-in point 10 chauh an hmu bawk.
Group hnih la khel lo mah se Mizoram aia point hmu hniam tur pahnih an awm sa avangin an tling nghal ang. Mahse, Mizoram hian Rajasthan an hneh zo lo a nih erawh chuan hmabak chu a harsa ve khawp ang.
Round 1
December 26, Thawhṭanni
Bihar 0 - 2 Jammu & Kashmir
J&K: Faisal Maqsood Thakur 38'; Aakif Javaid 58'
Rajasthan 0 - 7 Kerala
KER: Nijo Gilbert 6'; Viknesh M 12', 20'; Naresh Bhagyanathan 23', 36'; Riswanali Edakkavil 55', 81'
December 27, Thawhlehni
Andhra Pradesh 0 - 3 Mizoram
MIZ: Malsawmfela 26'; Joseph Lalvenhima 82', 90'
Round 2
December 29, Ningani
Jammu & Kashmir 2 - 3 Mizoram
J&K: Adnan Ayub 10'; Aakif Javaid 58' (P)
MIZ: Lalbiakhlua 33'; Lalthankhuma 83'; Lalnunzira Sailo 87'
Bihar 1 - 4 Kerala
BIH: Munna Mandi 70'
KER: Nijo Gilbert 24', 28'; Vishak Mohanan 81'; Abdu Raheem 85'
December 30, Zirtawpni
Rajasthan 1 - 0 Andhra Pradesh
RAJ: Youraj Singh 70'
Round 3
January 1, Pathianni
Bihar 1 - 3 Mizoram
BIH: Munna Mandi 33'
MIZ: K. Vanlalhriatzuala 2'; Lalbiakdika 59', 90+4'
Kerala 5 - 0 Andhra Pradesh
KER: Nijo Gilbert 16'; Mohamed Salim 19'; Abdu Raheem 45+4'; Vishak Mohanan 53'; Viknesh 62'
January 2, Thawhṭanni
Jammu & Kashmir 0 - 0 Rajasthan
Round 4
January 4, Nilaini
Bihar 08:00 AM Andhra Pradesh
Mizoram 03:30 PM Rajasthan
January 5, Ningani
Kerala 03:30 PM Jammu & Kashmir
Round 5
January 7, Inrinni
Bihar 08:00 AM Rajasthan
Andhra Pradesh 03:30 PM Jammu & Kashmir
January 8, Pathianni
Mizoram 03:30 PM Kerala